Yay tam gəlməsə də, ölkə ərazisində havalar kifayət qədər isinib. Artıq yay mövsümü üçün olan geyimlər qarderoblarda öz yerini almağa başlayıb. Bəs modelyerlər yay mövsümü üçün hansı geyimləri məsləhət görür? ANS PRESS bu sualın cavabını tapmaq üçün stilist, modelyerlərə müraciət edib.

Stilist Anar Atakişiyev yay mövsümündə əlvan, narıncı rənglərin dəbdə olacağını deyir. Onun sözlərinə görə, stil baxımından bu mövsümün dəbi uzun sarafanlar, bol yubkalardır, sinəsi altından başlayan geyimlərdir. Yayda şalvarlar, yubkaların balaqları yerlə sürünəcək.



"Həmişəki kimi ağ-qara rənglərdən də dəbli olacaq. Etnik ornamentli, buta, alov təsvirləri olan geyimlər dəbdə olacaq. Burada söhbət sırf Azərbaycana məxsus ornametlərdən deyil, ümumi naxışlardan gedir. Etnostil dəbdə olacaq”.





Saçlara gəldikdə isə kobud, səliqəsiz, buruq şəkildə olan düzümlər üstünlük təşkil edəcək. Çanatalarda isə böyük və kobudluq olacaq. Bütün bunlardan fərqli olaraq makiyaj çox səliqəli olmalıdır. “Gözlərin üzərinə səliqəli layner, dodaqlarda mat, parıltısız əlvan rəngli boyalar məsləhətdir. Avqust ayında isə parıltılı boya dəbdə olacaq. Kirşan isə daha çox kərpic və şaftalı rənglərdə olacaq. Dəri isə həmişəki kimi yayda qaralmış formada olur”.

Modelyer Sako da yayın əsas rəng tendesiyasının al-əlvanlıq olacağını deyib. Burada qırmızı, bənövşəyi rənglər daha çox üstünlük təşkil edəcək. Sarı kimi gözyorucu rənglər bu il dəbdə olmayacaq.

İsti yayın əsas dəb meyillərindən ən əsası isə uzun ətəklər, rəngarəng, güllü kombinezonlardır.

Sako da 70-ci illərin dəbinin qayıtdığını düşünür. Onun sözlərinə görə, yenidən qısa bricilər, ətək bricilər, aşırmalı sarafanlar dəbə minəcək: “Butalı, güllü, bəzəkli parçalar dəbdədir. Yay üçün yaxşı olar ki, bir necə rəngli, bəzəkli paltarlar olsun. Eynitonlu geyimlər yay üçün məsləhət deyil”.



Ayyaqabı dəbində də sadəlik, rahatlılıq hökm sürəcək. Havanın temperaturu nəzərə alsaq, eyni sözləri makiyaj haqqında da demək olar.

Çanta dəbinə gəldikdə isə stilist Anardan fərqli olaraq Sako bu mövsümdə orta ölçülü çantalardan istifadə etməyi məsləhət görür. “Bu il nə böyük, nə də çox kiçik çantalar dəbdə deyil. İndi orta ölçülü çantalardan daha çox istifdadə ediləcək”.

Dəblə ayaqlaşan qadınlara növbəti məsləhət isə saçlarla bağlıdır. Belə ki, əvvəlki illərdən fərqli olaraq bu il açıq, sarı deyil, formaca qısa və telli, rəngcə isə daha çox tünd, qəhvəyi, şokolad rəngi saçlara üstünlük veriləcək.







Yazda daha çox istifadə edilən paqonlu geyimlərdən isə yayda istifadə etmək məsləhət gürülmür.

Modelyer Zemfira Qurbanova da dəbi sevənlərə və izləyənlərə rəngli, əlvan geyinməyi məsləhət görür. “Hər kəs öz zövqünə görə geyinəcək. Ancaq açıq rənglər daha məsləhətlidir. Bu rənglər insana ruhuna daha çox yaxşı təsir edir”.

Havaların isinməsini, günəş şüalarının saç və dəriyə ziyanını nəzərə alaraq, qadınlara yayda baş örtüklərindən də geniş istifadə etmək tövsiyyə edilir.



Dəblə ayaqlaşmaq artıq ancaq qadınlara yox, həm də kişilər üçün vacib hala gəlib. Modelyerlər bu il qadınlarda olduğu kimi kişilərin də geyimlərində rəngarəngliyə çox yer veriblər.



Güclü cinsin nümayəndələri daha çox bu mövsümdə dar kəsimli şalvarlara, enli naxışlı köynəklərə meyl edəcək. Dünya modelyerləri kişilərin əvəzedilməzi olan cinslərə də kolleksiyalarında geniş yer veriblər. Yaz-yay rəngləri olaraq isə yaşıl, boz, mavi,qəhvəyi seçilib. Parlaq rənglərlə isə geyimlərə hərəkət qatmaq mümkündür.



Pencək seçərkən iki düyməli, bədənə oturan formalılar məsləhət görülür. Hər yay olduğu kimi bu yay da istər qadın, istərsə də kişilər üçün aksesuar olaraq gün eynəkləri, papaqlardan istifadə ediləcək.



Bu yayın dəbinin hazırlanmasında da əsas 1970-ci illərindən ilham alınıb.