Bakı Bələdiyyə Teatrının aktyoru İlqar Musayev indi də peşəkar idmanla məşğul olmağa hazırlaşır. Aktyor ANS PRESS-ə açıqlamasında bildirib ki, o artıq qərarını verib və növbəti 2016-cı ildə Braziliyanın Rio-de-Janeyro şəhərində keçiriləcək Olimpiadada Azərbaycanı təmsil etmək fikrindədir.

İlqar Musayev artıq ciddi cəhdlə məşqlərə başladığını və ağırlıqqaldırma idmanı üzrə yaxşı nəticələr əldə edəcəyini deyir. Aktyorun ən böyük arzusu isə peşəkar idmançı olub, bayrağımızı dünya arenalarında dalğalandırmaqdır.

“Mən çoxdandır həvəskar idmanla məşğul oluram. Heyifsləndim ki, gərək mən də bu il Londonda keçirilən XXX Olimpiadada iştirak edərdim. İnşallah növbəti Olimpiyada oyununda mən özüm də ağırlıq qaldırma idman növü üzrə iştirak edəcəyəm. Mən Olimpiadanı izlədim, oradakı çəkiləri gördüm. 100-120 kiloqram elə də əlçatmaz nəticə deyil. Mən həmin nəticəyə yaxınam. Növbəti Olimpiya yarışına qədər həmin çəkidən də artığını qaldıracam. Həmişə arzum olub ki, hansısa beynəlxaql səviyyəli yarışlara çıxım, uğur qazanım və Azərbaycan bayrağını başım üzərində qaldırım. İnşallah söz verirəm ki, 2016-cı ildə buna nail olacam”, - deyə İlqar Musayev vurğuladı.