Yaxın vaxtlarda ölkədə bir neçə yeni “ASAN” xidmət mərkəzi yaradılacaq. Yeni mərkəzlər yalnız Bakı sakinlərinə deyil, regionlarda yaşayanlara da xidmət göstərəcək.

“ASAN” Xidmət Mərkəzinin şöbə müdiri Azad Cəfərli: “May ayında Xətaidə, eyni zamanda Sumqayıtda, iyul ayında Yasamalda fəaliyyətə başlayacaq. Bununla da bütün Bakı qeydiyyatı olan vətəndaşlar “ASAN” xidmətdən yararlana biləcəklər. Avqustda isə Gəncədə fəaliyyətə başlayacaq”.

Gəncədə və Sumqayıtdakı “ASAN” xidmət mərkəzlərindən ətraf rayonların sakinləri də istifadə edə biləcəklər. May ayında açılışı olacaq və Xətai sakinlərinə xidmət göstərəcək 2 saylı “ASAN” xidmət mərkəzi şəhərin məşhur ticarət mərkəzlərindən birinin binasında yerləşir.

Binanın 2-ci mərtəbəsi vətəndaşlara Xidmət və Sosial İnnovasiyalar üzrə Dövlət Agentliyi tərəfindən icarəyə götürülüb. Artıq burada təmir işləri başa çatıb və son tamamlama işləri aparılır.

1 saylı mərkəzdə olduğu kimi 2 saylı “ASAN” xidmət mərkəzində də göstərilən xidmətlərin şəffaflığını və keyfiyyətini təmin etmək üçün otaqların divarları görünən materialdan şüşədən hazırlanıb.

2 saylı “ASAN” xidmət mərkəzində ilk mərkəzdə olan bütün xidmətlər göstəriləcək. Sumqayıt şəhərində yerəşə”ASAN” xidmət mərkəzinin binası isə demək olar ki, açılış üçün hazırdır.

Xatırladaq ki, “ASAN” xidmət mərkəzləri ölkə prezidentinin təşəbbüsü ilə vətəndaşlara göstərilən xidmətin keyfiyyətini artırmaq, məmur-vətəndaş ünsiyyətini azaltmaq və bununla da korrupsiyaya son qoymaq məqsədilə yaradılıb.

Təsadüfi deyil ki, Nazirlər Kabinetinin 2013-cü ilin birinci rübünün yekunlarına həsr olunan iclasında çıxış edən prezident İlham Əliyev məmur-vətəndaş ünsiyyətinin azaldılmasının vacibliyini bir daha vurğulayıb və məmurlara xəbərdarlıq edib.

Azərbaycan Respublikasının Prezidenti İlham Əliyev: “Dövlət məmurları xalqa xidmət edir və etməlidirlər. Bu məsələlərlə bağlı mən fikirlərimi bildirmişəm. Dövlət məmuru cəmiyyətdə hər bir vətəndaş üçün nümunə olmalıdır. Təvazökarlıq, saflıq və vətənə xidmət nümunəsi. Dövlət məmurları seçilmiş insanlar olmalıdır. Onların həm peşəkarlığı, həm də mənəvi keyfiyyətləri yüksək səviyyədə olmalıdır. Məmur-vətəndaş münasibətləri hörmət əsasında qurulmalıdır. Harada ki, nöqsanlar, pozuntular vardır, əlbəttə ki, tədbirlər görülür və bu proses bundan sonra da davam etdiriləcəkdir”.

Dövlət başçısı məmur-vətəndaş ünsiyyətinin azaldılması istiqamətdə “ASAN” xidmətin rolunu xüsusi qeyd edib. Bu xidmətin əhatə dairəsinin genişləndiriləcəyini bildirib.

Azərbaycan Respublikasının Prezidenti İlham Əliyev: “Hesab edirəm ki, bu ilin yayına qədər Bakının bütün rayonları əhatə ediləcəkdir. Eyni zamanda, böyük şəhərlər - Sumqayıt, Gəncə şəhərləri əhatə ediləcəkdir. Gələn il hesab edirəm ki, bütün başqa bölgələrdə xidmət yaranmalıdır”.

Qeyd edək ki, “ASAN” xidmət mərkəzlərində vətəndaşlar 9 dövlət qurumunun səlahiyyətlərinə aid müxtəlif sənədlər, arayışlar əldə edə bilərlər.