Rusiya kriminal aləminin ən nüfuzlu fiqurlarından sayılan Aslan Usoyan (“Ded Xasan” kimi tanınır) Moskvanın mərkəzində sui-qəsdə məruz qalıb. Hüquq-mühafizə orqanlarının məlumatına görə, o, təcili tibbi yardım maşını ilə xəstəxanaya aparılarkən yolda dünyasını dəyişib. Məlumata görə, kriminal avtoritetə odlu silahdan atəş açılıb. O, qarnından üç güllə yarası alıb.

Hücum Tver küçəsində yerli vaxtla saat 20.00-da (Bakı vaxtı ilə 21.00) baş verib. “Ded Xasan” evin alaqapısından çıxarkən atəş açılıb. Qatilin tək olduğu bildirilir..

“Ded Xasan” (əsl adı Aslan Usoyandır) 27 fevral 1937-ci ildə Tiflisdə anadan olub. O, Rusiyanın ən məşhur və nüfuzlu kriminal avtoritetlərindən sayılır. Rusiya ərazisində, xüsusilə, Ural və ölkənin cənub regionlarında qafqazlıların mütəşəkkil cinayətkar dəstələri onun nəzarətində olub. “Ded Xasan” Moskva, Sankt-Peterburq şəhərlərində, Rusiyanın mərəzi regionlarında, bir sıra yaxın və uzaq xarici ölkələrdə nüfuz sahibi idi.

Bəzi məlumatlara görə, 2006-cı ildə Aslan Usoyan və ondan heç də az tanınmayan kriminal avtoritet Tariel Oniani (“Taro” ləqəbli) arasında kriminal nüfuz dairəsinin bölüşdürülməsi üstündə münaqişə yaranıb. Aslan Usoyan “Yaponçik” ləqəbli Vyaçeslav İvankovla yaxın olub. Sonuncu ötən il oktyabrın 9-da Moskvadakı kafelərdən birinə girərkən qətlə yetirilib.

“Ded Xasan”ın qruplaşmasının əsas gəliri oyun biznesi, narkotik və silah dövriyyəsi, təbii ehtiyatların hasilatı sahələrindəndir.

XXX

“Ded Xasan”ın ölüm xəbəri yayıldıqdan bir qədər sonra ortaya ziddiyyətli məlumatlar çıxmağa başlayıb. Prokurorluq yanında İstintaq Komitəsinin Moskva üzrə İstintaq İdarəsinin rəisi Vyaçeslav Sovkov bildirib ki, “Ded Xasan” sui-qəsddən sağ çıxıb və xəstəxanaya yerləşdirilib. Onun Baqramyan soyadlı mühafizəşisi isə aldığı xəsarətlərdən dünyasını dəyişib.

Hüquq-mühafizə orqanlarının məlumatına görə, Aslan Usoyan hazırda əməliyyat olunur. Xəstəxananın ərazisində Xüsusi Təyinatlı Milis Dəstəsinin 20 döyüşçüsü növbə çəkir. Xəstəxanaya qara şüşəli bir neçə qara maşın gəlib.