Soydaşlarımızın təhsil aldığı məktəblər təmir olunur

Gürcüstanın Marneuli rayonunun iki kəndində təmir edilmiş məktəblərin açılış mərasimi keçirilib

Gürcüstanda azərbaycanlıların kompakt yaşadığı Marneuli rayonunun iki kəndində təmir edilmiş məktəblərin açılış mərasimi keçirilib. Mərasimdə Türkiyənin Gürcüstandakı səfiri Levent Murat Burhan və Gürcüstan prezidentinin anası Giuli Alasaniya iştirak edib.

Türkiyə səfiri jurnalistlərə açıqlamasında bildirib ki, Türkiyənin Əməkdaşlıq və İnkişaf Agentliyinin (TİKA) köməyi ilə Gürcüstanda buna bənzər layihə həyata keçirilib. O qeyd edib ki, təhsil ölkənin inkişafının əsas özəklərindən biridir. "Mən əminəm ki, gələcək nəsil iki ölkə arasında münasibətləri daha da möhkəmlədəcək", - deyə diplomat vurğulayıb.

Öz növbəsində G.Alasaniya bildirib ki, Gürcüstanın Təhsil Nazirliyi məktəblər üçün çox işlər görür. "Bununla belə hər bir yardım bizim üçün çox vacibdir", - deyə o qeyd edib.

Əlavə edək ki, mərasimdə Gürcüstan parlamentinin deputatı Azər Süleymanov da iştirak edib. O, ANS PRESS-ə açıqlamasında Türkiyənin Əməkdaşlıq və İnkişaf Agentliyinin müvafiq istiqamətindəki səylərin təqdirəlayiq olduğunu bildirib. Deputatın sözlərinə görə, bu kimi işlər digər kəndlərdə yerləşən məktəblərdə də görüləcək.

A.Süleymanov həmçinin qeyd edib ki, Gürcüstan rəhbərliyi ölkənin təhsil sisteminin inkişafına xüsusi diqqət yetirir.