Bakının regional inkişaf planı 2030-cu ilədək olan dövrü əhatə edəcək. Sovet dövründə hazırlanmış mövcud baş plan artıq bazar iqtisadiyyatının bütün tələblərinə cavab vermədiyi üçün Dünya Bankının dəstəyi ilə böyük Bakının inkişaf planı hazırlanır. Bu, yeni baş planın hazırlanması üçün əsas olacaq.

Dövlət Şəhərsalma və Arxitektura Komitəsinin şöbə müdiri Cahangir Qocayev bildirib ki, paytaxtın baş planı əvvəlkilərdən fərqlənəcək. Bu, bütünlüklə Bakının və ətraf qəsəbələrin, ümumilikdə Abşeron regionunun inkişaf parametrini də müəyyən edəcək daha uzunmüddətli sənəd olacaq. Bu planın işlənməsi zamanı anoloji dünya təcrübələrinə istinad ediləcək, Sumqayıt şəhərinin və Abşeron rayonunun da inkişaf parametrləri nəzərə alınacaq. Bununla yanaşı, hazırda Bakı şəhərinin mərkəzi hissəsinin müfəssəl planlaşdırılması üzrə də işlər görülür.

C. Qocayev diqqətə çatdırıb ki, hazırlanacaq baş planda lazım gələndə dəyişikliklər də ediləcək. Çünki gələcəkdə şəhərin ayrı-ayrı zonalarında və landşaft arxitekturasında dəyişiklik etmək, həm də dövlət əhəmiyyətli yeni obyektlərin tikintisi nəzərdə tutula bilər. Bu da, öz növbəsində baş planda müəyyən dəyişikliklərə ehtiyac yaradacaq.