Aktrisa Naina İbrahimova "Əməkdar artist" fəxri adına layiq görülüb. ANS PRESS-in məlumatına görə, Muzey Mərkəzində təşkil olunan təqdimat mərasimində mükafatları mədəniyyət və turizm naziri Əbülfəs Qarayev təqdim edib.

Rus Dram Teatrının aktrisası olan Naina çıxış edərək bu səviyyəyə gəlib-çatmasına görə teatrın kollektivinə öz təşəkkürünü bildirib. Sevincinin həddi-hüdudu olmayan aktrisa təəssüratlarını ANS PRESS-ə bölüşdü: "Çox sevincliyəm. Bu gün mükafat alan hər kəsi, elə özümü də təbrik edirəm".

Teatrdakı fəaliyyəti ilə yanaşı fotomodel kimi tanınan Naina İbrahimovanın həm də öz fərdi layihələri var. Buna misal olaraq, Maykl Ceksona həsr etdiyi möhtəşəm layihəsini nümunə çəkə bilərik.

Naina İbrahimova ilə birlikdə teatrın 5 aktyoru bu fəxri ada layiq görülüb. Teatrın qocaman aktrisası Nikuşina Aleksandra Konstantinovna isə "Xalq artisti" fəxri adı ilə təltif olunub.

Nazir Əbülfəs Qarayev bu dəfə yalnız Rus Dram Teatrının aktyorlarının fəxri adlarla təltif olunmasına da aydınlıq gətirib: "Bu mədəniyyət ocağı son illər tamaşaları və tamaşaçı bolluğu ilə fərqlənib və seçilib. Bu da dövlətin nəzərindən qaçmayıb".