«Dağlıq Qarabağ münaqişəsinin nizamlanması üçün hər iki tərəfin güzəştə getməsi lazımdır. Lakin ən vacib məsələlərlə bağlı kompromis hələ də əldə olunmayıb. Mən qeyd etməliyəm ki, Azərbaycan rəsmiləri, danışıqların gedişinə və mənasına uğyun gəlməyən bəyanatar verir». Bunları Ermənistanın xarici işlər naziri Edvard Nalbandyan deyib. Ermənistandakı hakimiyyət dəyişikliyinə toxunan nazir bildirib ki, rəsmi İrəvanın Dağlıq Qarabağla bağlı mövqeyi dəyişməz qalıb.

Ermənistanın xarici işlər naziri Azərbaycan və Ermənistan prezidentlərinin iyunun 6-da Sankt-Peterburqda keçirilmiş görüşünə də qiymət verib: «Biz bütün məsələləri həll etdikdən sonra Azərbaycanla sövdələşə bilərik. Rəsmi İrəvan, ATƏT-in Minsk Qrupunun Madrid razılaşması əsasında danışıqların davam etdirilməsinə hazırıq. İlham Əliyev və Serj Sarkisyanın görüşü işgüzar və konstruktiv şəraitdə keçib və bu, müəyyən ümidlər yaradır. İyunun sonlarında isə ATƏT-in Minsk Qrupu həmsədrlərinin regiona səfəri nəzərdə tutulub və səfər çərçivəsində razılaşmalar müzakirə olunacaq».

Bununla belə, Edvard Nalbandyan bir daha bəyan edib ki, Ermənistan hakimiyyəti Datlıq Qarabağ nümayəndələrinin danışıqlar prosesində iştirakında israr edir. Onun fikrincə, Dağlıq Qarabağ separatçı rejiminin danışıqlar prosesində iştirak etmədiyini iddia etmək düzgün olmaz. Çünki, həmsədrlər regiona səfərləri zamanı separatçı rejimin rəhbərləri ilə də görüşür. Edvard Nalbandyan hesab edir Ki, Dağlıq Qarabağın danışıqlarda iştirakı yalnız Ermənistan və Azərbaycandan asılı deyil. «Dağlıq Qarabağ nümayəndələri danışıqlara münaqişə tərəfi kimi nə qədər tez qoşulsa, o qədər yaxşıdır». Ermənistanın xarici işlər naziri belə deyib.

Rəsmi Bakı isə Qarabağ ermənilərinin danışıqlarda tərəf kimi iştirakının yolverilməz olduğunu bəyan edir. Çünki indi Ermənistanda hakimiyyətdə olanlar Qarabağdan çıxanlardır və onlar münaqişənin həlli prosesində birbaşa iştirak edirlər. Hazırda faktiki olaraq qondarma qurumun mövqeyini Ermənistanda hakimiyyətdə olan qarabağlılar ifadə edir. /ANS PRESS/

© 2008 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.