Bu gün Təhsil Nazirliyində «ali təhsil müəssisələrində istehsalat (pedaqoji) təcrübəsinin təşkili» mövzusunda kollegiya iclası keçirilib. ANS PRESS-in məlumatına görə, iclası giriş sözü ilə açan təhsil naziri Misir Mərdanov bu sahədəki problemlərdən danışıb. O qeyd edib ki, aidiyyatı üzrə işin yaxşılaşdırılması istiqamətində layihələr hazırlanır və bu məqsədlə böyük vəsaitlər ayrılıb.
Nazir ali təhsilin inkişafı ilə bağlı dövlət proqramının artıq hazır olduğunu və yaxın günlərdə müzakirəyə çıxarılacağını deyib. O qeyd edib ki, dekabrın 18-də Əmək və Əhalinin Sosial Müdafiəsi, Təhsil və Maliyyə Nazirlikləri birlikdə sənəd imzalayılar. Bu sənədə görə, ötən illərdə bu sahə üzrə qalan boşluqlar aradan qalıdrılacaq.
Bundan əlavə bu il ali məktəblərdə dekan və kafedra müdirləri üçün məvaciblər də ayrılacaq. Nazir sənəddə 152 dekan, 702 kafedra müdiri vəzifəsinin nəzərdə tutulduğunu vurğulayıb.
Misir Mərdanov bir sıra universitetlərin şəhər kənarına köçürülməsi ilə bağlı məsələyə də münasibət bildirib. Onun sözlərinə görə, buna səbəb şəhərdəki sıxlığı aradan qaldırmaq və tələbə, müəllim heyətini dünya standartlarına uyğun təhsil ocaqları ilə təmin etməkdir.
Daha sonra nazirliyin ali və orta ixtisas təhsil şöbəsinin rəisi İlham Mustafayev çıxış edib. O universitetlərdə tələbələrin təcrübə keçməsi sahəsindəki boşluqlardan danışıb. «Beynəlxalq Universitet tələbələrin təcrübə keçməsi üçün heç bir təşkilat ilə müqavilə bağlamayıb. Rəssamlıq Akademiyasında isə dərs saatları tədris yükünə uyğun hesablanmayıb. Ölkədəki özəl üniversitetlərdə isə müəllimlərin əksəriyyəti öz ixtisası üzrə dərs keçmirlər».

Gülnaz Qənbərli/ANS PRESS/

© 2008-2009 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.