Xəzər dənizində batmaq təhlükəsi ilə üzləşən, Azərbaycan tərəfinin xilas etdiyi Rusiyaya məxsus «Sarmat-1» gəmisinə dolan su boşaldılıb. Bu gündən gəmidə təmir işlərinə başlanılıb. Gəmidə təmir işləri ən geci 1 həftəyə yekunlaşmalıdır. Dövlət Dəniz Administrasiyasının rəis müavini Namiq Ağamalıyev ANS-ə müsahibəsində qəzanın baş vermə səbəbinin ilkin versiyaya uyğun olduğunu açıqlayıb: «Hava şəraitinə görə gəminin sükan hissəsinə su daxil olub. Sükan mühərrik hissəsi elektrik avadanlığından ibarətdir. Elektrik avadanlıqları da tamamilə sıradan çıxıb. Onun bərpa olunmasına vaxt lazımdır. Tam texniki baxışdan və yoxlamalardan sonra biz qərara gəlmişik ki, yükü boşaldaq. Çünki yüklə heç bir gəmi təmir olunmur».

Xatırladaq ki, «Sarmat-1» gəmisinin batmaq təhlükəsi ilə üzləşməsi barədə məlumat dekabrın 15-də Həştarxanda yerləşən xilasetmə işləri əlaqələndirmə mərkəzindən daxil olub. Dübəndi limanından 30 mil aralıda ( təqribən 55 km) batmaq təhlükəsi ilə üz-üzə qalan Rusiyaya məxsus «Sarmat-1» gəmisini dekabrın 15-i gecə saatlarında Azərbaycana məxsus «Vadim Seyidov» gəmisi yedəyə alıb. Çay-dəniz tipli «Sarmat-1» gəmisi 1986-cı ildə inşa edilib. Həştərxan -Ənzəli (İran) reysi ilə hərəkət edən gəmi təqribən 1750 ton metal məhsullar və ağac materialı daşıyırmış. /ANS TV/

© 2008-2009 Bütün hüquqlar qorunur. Xəbərlərdən istifadə edərkən ANS-PRESS-ə istinad zəruridir.