AB Bakı və İrəvanla regional marşrutları müzakirə edir

AB Bakı və İrəvanla regional marşrutların inkişafını müzakirə edir.

Avropa İttifaqı Ermənistan və Azərbaycan hakimiyyəti ilə Brüsselin Cənubi Qafqazda nəqliyyat marşrutlarının inkişafını necə dəstəkləyə biləcəyini müzakirə edir.

Bu barədə İrəvanda keçirilən brifinqdə AB-nin Cənubi Qafqaz üzrə xüsusi nümayəndəsi Maqdalena Qrono bildirib.

"Regionda davamlı sülhün qurulmasındakı irəliləyiş inanılmaz dərəcədə təsirlidir və əlbəttə ki, biz Avropa İttifaqı olaraq bu sülhün bütün insanlara fayda verən davamlı bir reallığa çevrilməsini təmin etmək üçün həm Ermənistan, həm də Azərbaycan üçün güclü tərəfdaş olmağa çalışırıq", - "Armenpress" onun sözlərini sitat gətirir.

Onun sözlərinə görə, Brüssel Ermənistan və Azərbaycan arasındakı sülh prosesini müxtəlif yollarla dəstəkləyir. Regional bağlantı məsələləri də AB üçün əsas diqqət mərkəzindədir.

"Biz Ermənistan hakimiyyəti ilə və əlbəttə ki, Azərbaycan tərəfdaşlarımızla marşrutların inkişafını necə dəstəkləmək barədə müzakirələr aparırıq ki, bütün ölkələr iştirak etsin, marşrut boyunca yerləşən bütün yaşayış məntəqələrinin sakinləri bundan faydalansın və əlbəttə ki, Asiyanı Cənubi Qafqaz vasitəsilə Avropa ilə birləşdirən AB-nin prioritet Orta Dəhliz layihəsinə əhəmiyyətli töhfə verək", - Qrono vurğulayıb.