Avropa gizli şəkildə genişmiqyaslı hibrid hücuma hazırlaşır

AB gizli şəkildə itkilərlə nəticələnə biləcək genişmiqyaslı hibrid hücuma hazırlaşır - "Politico"

27 AB ölkəsinin səfirləri bir neçə həftədir ki, Brüsseldə çoxsaylı itkilərlə nəticələnən genişmiqyaslı hibrid hücum ssenarisini müzakirə etmək üçün qapalı görüşlər keçirirlər. Görüşlər məhdud formatda, telefonlar və köməkçilər olmadan keçirilir. Leypsiq hava limanında partlayıcı maddələrlə yüklənmiş dron aşkarlanmasından, Polşanın Starlink rabitə stansiyasında baş verən yanğından və AB və Böyük Britaniyada yük təyyarələrinə yandırıcı qurğuların yerləşdirilməsi cəhdlərindən sonra müzakirələr daha da güclənib.

"Ciddi bir şeyə hazır olmalıyıq. Leypsiqdəki hadisələr göstərdi ki, çoxsaylı itkilərə səbəb olan çox ciddi bir hadisə istisna edilə bilməz", - deyə AB-nin yüksək vəzifəli diplomatı bildirib. AB böhrana cavab qruplarının yaradılması, təsirlənmiş ölkələrə təcili yardım maliyyəsinin ayrılması və böhran rabitəsinin koordinasiyası məsələlərini müzakirə edir. Lakin bəzi ölkələr NATO-nun funksiyalarının təkrarlanmasından və qərar qəbuletmənin ləngiməsindən narahatdırlar.

Avropa Komissiyasının Prezidenti Ursula fon der Leyen yeni Avropa Təhlükəsizlik Strategiyasına daxil edilməsi üçün "təhlükəsizlik fövqəladə halları haqqında protokol" hazırlamağı təklif ed9b. Lakin bəzi diplomatlar mövcud AB cavab mexanizmlərindən istifadə etməyi təklif edirlər.