Azərbaycan-Ermənistan Bəyannaməsi Türk xalqlarının zəfəridir

Bu gün BMT Təhlükəsizlik Şurasında ciddi islahata ehtiyac var, inkişaf etməkdə olan ölkələrin səsi orada daha gur gəlməlidir.

Bunu Özbəkistan Respublikasının Prezidenti Şavkat Mirziyoyev Türk Dövlətləri Təşkilatının Dövlət Başçıları Şurasının 12-ci Zirvə Görüşündə deyib.

O bildirib ki, TDT-nin beynəlxalq təşkilat kimi rolunun gücləndirilməsi üçün Strateji Dostluqla bağlı Sazişin qəbul edilməsi prosesi yekunlaşdırılmalıdır: “Biz iqtisadi və ticari münasibətlərimizin sənaye sahəsində də gücləndirilməsini, Türk dövlətlərinin Sənaye Alyansının təsis edilməsini təklif edirik. Praktiki əməkdaşlığımız konkret layihələrlə həyata keçirilməlidir.

Eyni zamanda, Türk Yaşıl Koridoru adlandırılan elektron sistem yaradılmasını, yaşıl enerji ilə bağlı aparıcı texnologiyaların, dövlət-özəl layihələrin təşviqini də təklif edirik”.

Özbəkistan lideri Azərbaycan-Ermənistan sülh danışıqları prosesinə də toxunub. O qeyd edib ki, Vaşinqtonda Azərbaycanın Ermənistanla imzaladığı Birgə Bəyannamə Türk xalqlarının zəfəridir.

Şavkat Mirziyoyev vurğulayıb ki, Bəyannamə iqtisadiyyat, nəqliyyat kimi sahələrdə əməkdaşlıq imkanları ortaya qoyur.