Bakının küçə və prospektlərində hərəkət sürəti azaldılır

Martın 17-dən Bakının bəzi küçə və prospektlərində nəqliyyatın hərəkət sürəti azaldılır. Bu barədə cümə axşamı Bakı Nəqliyyat Agentliyinin rəhbəri Vüsal Kərimli bildirib.

Məhdudiyyətlər əsasən  Heydər Əliyev, Babək, Ziya Bünyadov, Qara Qarayev və digər prospektlərə şamil ediləcək.

Belə ki, Heydər Əliyev prospektində mərkəzdən "Koroğlu" metro stansiyasına qədər maksimal hərəkət sürəti 90 kilometr/saatdan 70 kilometr/saata, daha sonra 110 kilometr/saatdan 90 kilometr/saata endirilir.

Beləliklə, Mərdəkan və Zağulba magistral yollarında da sürət azalacaq.

Ziya Bünyadov prospektində sürət 90 kilometr/saatdan 70 kilometr/saata endiriləcək.

Paytaxtın mərkəzi küçələrində sürət 60 kilometr/saatdan 50 kilometr/saata endiriləcək.

Kərimlinin sözlərinə görə, bütün bu ərazilərdə müvafiq yol nişanları quraşdırılacaq.

“Bakı Nəqliyyat Agentliyi yol hərəkəti təhlükəsizliyi səviyyəsinin artırılması, nəqliyyat axınlarının effektiv idarə olunması məqsədilə 14 yol sahəsində sürət hədlərinin endirilməsilə bağlı təkliflər hazırlayıb və Daxili İşlər Nazirliyi Baş Dövlət Yol Polisi İdarəsilə razılaşdırıb”, -  o deyib.

Eyni zamanda, o bu məhdudiyyətlərin müvəqqəti və ya daimi olub- olmayacağını açıqlamayıb.