"Fitch": Hörmüz böhranı neftin qiymətini kəskin artıracaq

2026-cı ildə "Brent" markalı neftin orta qiymətinin 87 ABŞ dolları səviyyəsində olacağı gözlənilir.

Bu barədə beynəlxalq reytinq agentliyi "Fitch Ratings"in iyun ayı üzrə proqnozunda bildirilib.

Agentlik Brent nefti üzrə 2026-cı il orta qiymət proqnozunu 17 dollar və ya 24,3% artıraraq 70 ABŞ dollarından 87 ABŞ dollarına yüksəldib. Proqnoza yenidən baxılmasına əsas səbəb kimi Hörmüz boğazının gözləniləndən daha uzun müddət bağlı qalması göstərilib.

"Fitch" qeyd edir ki, ABŞ-İran müharibəsindən sonra elan olunan atəşkəs qüvvədə qalsa da, Hörmüz boğazı artıq 14 həftədir bağlıdır. Agentliyin yeni baza ssenarisinə görə, boğazın yenidən açılması iyul ayında başlayacaq, dəniz daşımalarının isə avqustda daha geniş bərpası baş tutacaq. Bu isə boğazın ümumilikdə təxminən beş ay bağlı qalması deməkdir.

Hesabata görə, Körfəz Əməkdaşlıq Şurası (GCC) ölkələrinin neft ixracındakı fasilələr fonunda Brent neftinin qiyməti aprel və may aylarında orta hesabla 103 dollar/barel təşkil edib.

Bununla yanaşı, "Fitch" ilin ikinci yarısında bazarda vəziyyətin normallaşacağını gözləyir. Agentlik hesab edir ki, neft infrastrukturuna ciddi ziyan dəymədiyindən Körfəz ölkələrində hasilat sürətlə bərpa olunacaq, OPEC isə itirilmiş həcmləri kompensasiya etmək üçün maksimum güclə istehsal aparacaq.

"Fitch"in proqnozuna əsasən, neft qiymətləri 2026-cı ilin dördüncü rübündə yenidən 70 dollar/barel səviyyəsinə enəcək. Buna baxmayaraq, ilin ümumi orta göstəricisi 87 dollar/barel olacaq.