İran İsrailin bütün infrastrukturlarını vuracaq

General-mayor Məhəmmədhüseyn Baqiri İsrailin bölgədə davamlı cinayətləri və Tehranda İsmayıl Haniyənin öldürülməsinə cavab olaraq çərşənbə axşamı gecəsi İranın İsrailə qarşı cavab hücumuna toxunaraq deyib: "İsrail rejiminin cinayətlərinə artıq dözmək olmaz". 

O, Tehranda İsmayıl Haniyənin öldürülməsinə və Qəzzada atəşkəsin yaradılması üçün Qərbin İranı təmkinli olmağa çağırmasına toxunaraq, "Son iki ay İran xalqı və müqavimət üçün iki çox çətin ay oldu" deyib.

"Lakin cinayətkar sionist rejim ABŞ-ın dəstəyi və yaşıl işığı ilə cinayətlərini artırıb", - deyə Baqiri əlavə edib.

İran İslam İnqilabı Keşikçiləri Korpusunun İsrailə qarşı raket əməliyyatının sionist rejimin mühüm hərbi bazalarını vurmaqda öz məqsədlərinə çatdığını söyləyən Baqiri bildirib ki, İsrail rejiminin törətdiyi cinayətlərə baxmayaraq, İran yalnız Tel-Əviv rejiminin hərbi mərkəzlərini hədəf alıb.

O əlavə edib ki, Mossad qərargahı, Nevatim aviabazası və Hatzerim aviabazası hədəflərdir.

"Həmçinin, bu əməliyyatda Qəzza xalqının qətliamına cavabdeh olan strateji radarlar, eləcə də Qəzza ətrafındakı bölgədə rejimin tank, personal daşıyıcı və şəxsi heyətin toplama mərkəzləri hədəfə alınıb. Bu əməliyyatda rejimin iqtisadi və sənaye infrastrukturu hədəf alınmadı, onların insanları hədəf alınmadı, halbuki bu tamamilə mümkün idi. Əgər çılğınlıq səviyyəsinə çatmış sionist rejim ABŞ və Avropa tərəfindən idarə olunmasa və bu cür cinayətləri davam etdirmək və ya suverenliyimiz və ərazi bütövlüyümüzə qarşı addım atmaq istəsə, bu gecə əməliyyatı daha geniş miqyasda təkrarlanacaq və bütün infrastrukturlara zərbə vurulacaq”, - Baqiri xəbərdarlıq edib.

İran çərşənbə axşamı gecə öz istehsalı olan raketləri ilə İarailə cavab hücumu edib və İslam İnqilabı Keşikçiləri Korpusu (SEPAH) onların 90%-nin hədəfləri vurduğunu bildirib.

"Mehr"in yazdığına görə, əməliyyat HƏMAS-ın rəhbəri İsmayıl Haniyə, "Hizbullah" lideri Seyid Həsən Nəsrullah və SEPAH komandiri Abbas Nilforuşanın öldürülməsinə cavab olaraq həyata keçirilib.