Qırğızıstanda keçirilən festivalda erməni filminə qadağa

Qırğızıstanda keçirilən festivalda erməni təbliğat filmi nümayişdən çıxarılıb.

Qırğızıstanın paytaxtı Bişkekdə keçirilən "Umut" kinoforumunda Azərbaycandan iki film təqdim olunub: rejissor Azər Quliyevin “Sanki yoxsan” və rejissor Murad Şükürlünün “Bir dəfə Sabunçuda”.

Xüsusilə qeyd etmək lazımdır ki, Azər Quliyevin “Sanki yoxsan” filmi münsiflər heyəti və tamaşaçılar tərəfindən yüksək qiymətləndirilərək beynəlxalq müsabiqənin baş mükafatına layiq görülüb. Forumun əsas nominasiyasında qalibiyyət təkcə filmin yaradıcı kollektivi üçün deyil, bütün Azərbaycan kinosu üçün mühüm hadisə olub.

Qeyd edək ki, forumun müsabiqə proqramına Ermənistandan “David bağı” (“David’s Garden”) sənədli filmi də daxil edilib. Filmin məzmunu ilə tanış olduqdan sonra Azərbaycan nümayəndə heyəti öz mövqeyini belə əsaslandıraraq kəskin etirazını bildirib: filmdə Azərbaycan ərazilərinin tarixi-coğrafi kimliyini təhrif edən uydurma toponimlərdən istifadə olunub.

Əsas personaj işğalçı qüvvələrin tərəfində olan silahlı münaqişələrin iştirakçısıdır ki, bu da birbaşa təxribat və təcavüzkarı izzətləndirmək cəhdi kimi qəbul edilir.

Bununla əlaqədar Azərbaycan nümayəndə heyətinin nümayəndələri festivalın təşkilat komitəsinə “David bağı” filminin müsabiqə proqramında iştirakına yenidən baxılması çağırışı ilə rəsmi müraciət ünvanlayıblar. Onlar bəyanatlarında siyasi təxribat elementlərini ehtiva edən, milyonlarla azərbaycanlının tarixi yaddaşını və hisslərini təhqir edən filmlərin nümayişinin yolverilməzliyini vurğulayıblar.

"Umut" kinoforumunun təşkilat komitəsi Azərbaycan nümayəndə heyətinin bəyanatına hörmətlə yanaşıb. Müzakirələrdən sonra festival rəhbərliyi “David’s Garden” filminin müsabiqə nümayişindən çıxarılması barədə qərar qəbul edib. Rəsmi açıqlamada qeyd edildiyi kimi, filmin məzmunu millətlərarası münaqişənin kəskinləşməsinə səbəb ola biləcək şərhlərə imkan verir.
Bu qərarla bağlı məlumat kinoforumun rəsmi resurslarında, o cümlədən internet saytında və sosial şəbəkələrdəki səhifələrdə dərc olunub.