“Sony” şirkəti CD-R, DVD-R və BD-R-in istehsalını dayandırır
Yapon mənbələri xəbər verir
![“Sony” şirkəti CD-R, DVD-R və BD-R-in istehsalını dayandırır](/uploads/images/2024/07/rs/image_750x_66826690357c5-750-1080-resize.webp)
“Sony” şirkəti Yaponiyanın Taqajo şəhərindəki optik disklər fabrikində qeydə alına bilən optik mediadan tamamilə imtina təşəbbüsü çərçivəsində 250 işçini ixtisar edəcəyini açıqlayıb. Bütün bunlar həmin məhsullara tələbatın azalması ilə bağlıdır, artıq istehlakçılar digər media vasitələrinə üstünlük verirlər.
Yaponiyanın “Mainichi” milli qəzeti xəbər verir ki, “Sony” şirkəti Yaponiyanın şimal-şərqindəki zavodunda optik disklərin saxlanması üçün daşıyıcıların, o cümlədən “Blu-ray” disklərinin istehsalını mərhələli şəkildə dayandıracaq. Müəssisənin 670 işçisindən təxminən 250-si ixtisar ediləcək, bəzi işçilərə isə erkən pensiya paketləri təklif ediləcək.
İxtisarların yalnız CD-R, DVD-R və BD-R kimi getdikcə lazımsız olan media alətləri istehsalına təsir edəcəyi, audio, video və oyun bazarı üçün disklərin istehsalının isə eyni həcmdə davam edəcəyi qeyd edilir. Belə ki, yayım axını xidmətlərinin artan populyarlığı fonunda bəzi istehlakçılar daha yüksəkkeyfiyyətli audio və video, habelə kolleksiyalar yaratmaq qabiliyyətinə görə hələ də fiziki mediaya üstünlük verirlər. Bundan əlavə, əvvəllər alınmış rəqəmsal məzmunun əlçatmaz olduğu bir çox hallar da mövcuddur.
Ümumi tendensiya optik disklərə tələbatın azaldığını göstərir. Optik disk drayverləri (ODD) çoxdan masaüstü kompüterlərin və noutbukların mühüm komponenti olmaqdan çıxıb və istifadəçilər məlumatların ehtiyat nüsxəsini çıxarmaq üçün getdikcə daha çox xarici sabit diskləri, SSD-ləri, yaddaş kartlarını, fleş diskləri, şəbəkəyə qoşulmuş yaddaşı (NAS) və bulud xidmətlərini seçirlər. Məlumatların saxlanması texnologiyaları inkişaf etdikcə, qlobal texnologiya bazarında istehlakçı seçimləri də dəyişir.