Xankəndi stadionunda təmir-bərpa işləri başlayıb

Antiterror tədbirlərindən sonra işğaldan azad olunmuş Xankəndi şəhərindəki mərkəzi futbol stadionunda da təmir-bərpa işlərinə start verilib.

Artıq separatçıların qondarma “bayrağının” rəngində olan oturacaqlar stadionin tribunalarından sökülüb. Onların Azərbaycan bayarağının rəngində olan oturacaqlarla əvəz ediləcəyi gözlənilir.

Sözügedən arenanın tutumu 15 min nəfərdir. Yeri gəlmişkən, “Qarabağ" futbol klubunun  bu mövsüm Premyer Liqanın, yaxud ölkə kubokunun bir neçə oyununu Xankəndi şəhr stadionunda keçirəcəyi gözlənilir. Ağdam klubu dövlət qurumlarının bununla bağlı müvafiq təklifini müsbət cavablandırıb.

Klub bəzi ev matçılarının Xankəndidə təşkili ilə əlaqəli tədbirlər planı hazırlayacaq və onu müvafiq instansiyalara təqdim edəcək.

"Qarabağ" rəhbərliyi bu yaxınlarda Xankəndidə olub, stadiona baş çəkib, buranın vəziyyəti ilə yaxından tanış olub.

Qeyd edək ki, təbi qazonlu idman qurğusu ötən əsrin ikinci yarısında tikilib. 1927-ci ildə Xankəndi şəhərində “Dinamo” adlı yerli futbol klubu yaradılıb. 1974-cü ildə klub "Qarabağ" adlandırılıb. Bu klub 1977-ci ildə Futbol üzrə Azərbaycan SSR çempionatının qalibi olub. 1950 və 1986-cı illərdə SSRİ Kuboku yarışlarında iştirak edib. Xankəndinin “Qarabağ” klubu 1989-cu ilədək fəaliyyət göstərib.

Bütün bu illər ərzində komandanın heyətində hər mövsüm bir-iki nəfər azərbaycanlı oynayıb. Qalan oyunçuları ermənilər təşkil edib.