ANS Press
ANSTV
ANSÇM
“Aframax” tipli “Şuşa” tankerinin ilk səfəri baş tutub
Bu barədə ASCO məlumat yayıb
1 dəqiqə
“Azərbaycan Xəzər Dəniz Gəmiçiliyi” QSC (ASCO) və Azərbaycan Dövlət Neft Şirkətinin (SOCAR) Müşahidə Şurasının razılığı ilə paritet əsaslarla yaradılmış “SA Maritime AFEZCO” Birgə Müəssisəsinə məxsus “Aframax” tipli “Şuşa” tankerinin ilk səfəri baş tutub.
Bu barədə ASCO məlumat yayıb.
Məlumata görə, səhmdar cəmiyyətinin 100 % törəmə müəssisəsi - “ASCO Ship Management AFEZCO” şirkətinin idarə etdiyi gəmi iyulun 29-da Libiyanın Es Sider limanında xam neftlə yüklənib və İtaliyanın Augusta limanına doğru yola çıxıb. Tankerin ilk səfəri uğurla tamamlanıb və təyinat limanında yük təhlükəsiz şəkildə gəmidən boşaldılıb.
“SA Maritime AFEZCO”nun aldığı "Aframax" tipli 3 tankerin hər birinin dedveyti (ümumi yükgötürmə qabiliyyəti) təxminən 115 000 tondur və onlar Xəzərdənkənar sularda Azərbaycan bayrağı altında istismar ediləcəklər.
