Ağ Evin növbəti mətbuat katibi Keti Zakariyadır

ABŞ Prezidenti Donald Tramp Ağ Evə növbəti mətbuat katibi təyin edib. 

Bu barədə Tramp "Truth Social"da yazıb:

"Keti Zakariyanı (Katie Zacharia) mətbuat katibi vəzifəsinə təyin etmək mənim üçün böyük şərəfdir. Keti hazırda "Truth Social" (Trump Media & Technology Group) şirkətində kommunikasiya üzrə baş müşavir kimi fəaliyyət göstərir və orada əla nəticələr nümayiş etdirir! Əslən Kaliforniyadan olan Keti daha əvvəl Daxili Təhlükəsizlik Departamentində mətbuat katibi və ictimaiyyətlə əlaqələr üzrə katib köməkçisinin müavini vəzifələrində çalışıb. O, Pepperdin Universiteti və Pepperdin Karuzo Hüquq Məktəbinin (Pepperdine Caruso School of Law) məzunudur, vəkil kimi fəaliyyət göstərir və "Fox News" ilə "Newsmax" kimi media qurumlarında tez-tez şərhçi qismində çıxış edir. O, əvvəllər mənim seçki kampaniyalarımda iştirak edib və həlledici əhəmiyyət daşıyan ştatlarda (nəticəsi bəlli olmayan ştatlarda) dəstək göstərib; həmin ştatların hər yeddisində də qələbə qazanmışıq. Onun qüsursuz bir dəstək fəaliyyəti var və o, əvvəldən bəri sadiq və parlaq bir tərəfdar olub. Eyni zamanda, o, "MAGA" hərəkatının sadiq üzvü və tərəfdarıdır! Əminəm ki, Keti Ağ Evin növbəti mətbuat katibi kimi ölkəmiz üçün uğurlu nəticələr əldə edəcək; o, həm media, həm Amerika xalqı, həm də mənim administrasiyam tərəfindən hörmətlə qarşılanır və onlarla əla iş birliyi quracaq. Keti bu vəzifədə mətbuat katibi kimi möhtəşəm iş görmüş Karolin Liviti (Karoline Leavitt) əvəz edir. Uğurlar, Keti! 

Öz növbəsində Keti Zakariya Trampa cavab yazıb ki, "Ağ Evin mətbuat katibi kimi xidmət etmək kimi yüksək bir imtiyazı mənə verdiyi üçün Prezident Trampa təşəkkür edirəm.

250 illik tariximizin bu həlledici məqamında Prezident Trampa və Amerika xalqına xidmət etmək ömürlük bir şərəfdir. Prezident Tramp Amerikaya göstərdi ki, biz yenidən böyük ola bilərik və o, hər gün bu böyüklüyü reallaşdırmaq üçün çalışır. Onun mənə göstərdiyi etimad əsl imtiyazdır, liderliyi isə bu ölkə üçün bir nemətdir.

Qarşıda duran vəzifə ölkəmiz üçün güclü nəticələr əldə etməyə davam etmək və bu Administrasiyanın hər gün qazandığı mühüm uğurları Amerika xalqına çatdırmaqdır. Bu nailiyyətləri ictimaiyyətə çatdırmaq məqsədilə Ağ Evin mətbuat korpusu və ölkə üzrə jurnalistlərlə işləməyi səbirsizliklə gözləyirəm. Möhtəşəm Kerolayn Levittdən (Karoline Leavitt) sonra bu vəzifəni icra etmək yüksək bir standart müəyyən edir və bu standarta cavab verməyə dəyər.

Tanrı Prezident Trampı və Amerikanı qorusun".