AİHM mərkəzdə sökülən bina sakinlərinə 1,7 mln avro kəsdi

Avropa Məhkəməsinin qərarına əsasən, hökumət 18 ərizəçiyə maddi və mənəvi ziyana görə bu təzminatı ödəməyə borcludur

Oxuma müddəti:

1 dəqiqə

Avropa İnsan Haqları Məhkəməsi (AİHM) Azərbaycanın mülkiyyət hüquqlarının pozulmasına görə 1 milyon 693 min 892 avro məbləğində təzminat ödəməli olması barədə qərar çıxarıb.

AİHM qərarını Bakıda Qış Parkının tikintisi zamanı çıxarılan şəxslərin ifadələri əsasında qəbul edib.

2008-ci ildə Bakı şəhər İcra Hakimiyyəti başçısının sərəncamı ilə Füzuli, Səməd Vurğun, Şəmsi Bədəlbəyli və Topçubaşov küçələrində 500-dən çox yaşayış və qeyri-yaşayış sahəsi sökülüb, sakinlər köçürülüb. Ərizəçilər mülkiyyət hüquqlarına müdaxilədən şikayətlənərək ədalətli mühakimə olunmasını tələb ediblər.

Hələ 2022-ci ildə AİHM bu işdə bir çox mülkiyyətçilərin hüquqlarının pozulmasını müəyyən edib və kompensasiya məsələsini həll etmək üçün vaxt verib.

Yanvarın 14-də Avropa Məhkəməsi qərarını açıqlayıb, ona görə hökumət 18 ərizəçiyə 1 milyon 693 min avro məbləğində maddi və mənəvi ziyana görə təzminat ödəməyə borcludur.

Məhkəmə qərarına əsasən, bütün ərizəçilərə dəymiş maddi və mənəvi ziyan 3 ay ərzində ödənilməlidir. Müraciət edənlərə ödəniləcək kompensasiyanın ümumi məbləği 1 milyon 693 min 892 avro təşkil edir.