Ararat Melkumyan Laçın yolunda saxlanılıb?

Özünü buraxmış qondarma “Dağlıq Qarabağ respublikası”nın “milli təhlükəsizlik şurasının direktoru” Ararat Melkumyanın “Laçın” sərhəd-keçid məntəqəsində həbs edildiyi barədə məlumat yayılıb.

Bununla bağlı ilk məlumatı ermənilərin “MediaHub” saytı yayıb.

A.Melkumyan general-mayor hərbi rütbəsinə malikdir.

Erməni tərəfi hələlik Melkumyanın həbsi xəbərini rəsmən təsdiqləməyib.

Qeyd edək ki, Ararat Melkumyan 2023-cü ilin yanvarında Qarabağdakı erməni separatçı-terrorçu dəstənin başçısı Arayik Arutyunyan tərəfindən qondarma “Artsax rejimi”nin “təhlükəsizlik direktoru” Vitali Balasanyanın yerinə gətirilmişdi.

Onun Arayik Arutyunyanın yaxın dostu olduğu da bildirilir.

Ararat Melkumyan 1973-cü il fevralın 1-də Xocavənd rayonunun Qırmızı Bazar kəndində anadan olub.

Separatçılar arasında nüfuzlu hərbçilərdən sayılır. Melkumyan 1990-cı illərdən Qarabağdakı separatçı hərakata qoşulub. O, həm 2016-cı ilin dörd günlük aprel müharibəsində, həm də 2020-ci ildəki 44 günlük müharibədə Azərbaycana qarşı döyüşüb.

Ararat Melkumyan 2022-ci il sentyabrın 13-də Ermənistanla sərhəddə gedən döyüşlərdə də Azərbayacan qarşı vuruşub. Belə ki, onun həmin döyüşlərə  Qarabağdan hərbi təlim keçmiş bir dəstə apardığı bildirilir.

Melkumyan 2020-ci ildəki 44 günlük müharibədə Azərbaycana qarşı döyüşdüyünə görə qondarma “Artsaxın milli qəhrəmanı” adı alıb.  

Azərbaycan tərəfi bununla bağlı həər hansı məlumat yaymayıb.