Rəhbər Komitənin Budapeşt görüşü mühüm nəticələrlə bitdi
Toplantıda Azərbaycan, Gürcüstan, Bolqarıstan, Rumıniya və Macarıstan energetika nazirləri iştirak edir YENILƏNIB

16:40
Azərbaycan, Gürcüstan, Rumıniya və Macarıstan arasında “yaşıl enerji” dəhlizinin yaradılması üzrə nazirlərin, Rəhbər Komitənin Budapeşt görüşü mühüm nəticələrlə yekunlaşdı.
Bu barədə energetika naziri Pərviz Şahbazov “X” sosial şəbəkə hesabında paylaşım edib.
Məlumata görə, layihəyə PMI statusunun verilməsi məqsədilə “Azərbaycan, Gürcüstan, Rumıniya və Macarıstanın Avropa İttifaqının (Aİ) enerji məsələləri üzrə komissarı Dan Yorgensenə Birgə Məktubu” imzlanıb. Həmçinin Aİ-nin On İllik Şəbəkə İnkişafı Planına (TYNDP) layihənin daxil edilməsi, Bolqarıstanın layihəyə qoşulması və fiber-optik kabel (FOC) komponent ilə əlaqədar zəruri addımlar razılaşdırılıb.
Birgə Müəssisəyə (GECO Power Company) texniki-iqtisadi əsaslandırma ilə bağlı səlahiyyət və öhdəliklərin ötürülməsi ilə bağlı da müvafiq sənəd imzalanıb.
***
Budapeştdə Yaşıl Enerji Transferi Sazişinin nazirlərin növbəti iclası başlayıb
Budapeştdə, Puşkaş Ferens adına Olimpiya Stadionunun konfrans zalında “Azərbaycan Respublikası, Gürcüstan, Rumıniya və Macarıstan hökumətləri arasında yaşıl enerjinin inkişafı və ötürülməsi üzrə Strateji Tərəfdaşlıq Sazişi”nin tərəflərinin rəhbər komitəsinin 10-cu iclası öz işinə başlayıb.
Onun işində Gürcüstan, Bolqarıstan, Rumıniya və ev sahibi Macarıstandan olan həmkarları ilə birlikdə Azərbaycanın energetika naziri Pərviz Şahbazov iştirak edir.
Görüşdən əvvəl qonaqları Macarıstanın xarici işlər və ticarət naziri Peter Siyarto qarşılayıb.
Bu dəqiqələrdə nazirlərin dar tərkibdə görüşü keçirilir, ondan sonra plenar iclas keçiriləcək. Tədbir mətbuat konfransı ilə yekunlaşacaq.
Xatırladaq ki, sözügedən Saziş 1 QVt gücündə elektrik enerjisinin ötürülməsi üçün Qara dənizin dibi ilə kabelin çəkilməsini nəzərdə tutur.