Əli Kərimlinin evində axtarış aparılıb YENİLƏNİB

Azərbaycan Xalq Cəbhəsi Partiyası (AXCP) Rəyasət Heyətinin üzvünün evində axtarış aparılıb.

Axtarış Məmməd İbrahimin evində olub.

Xatırladaq ki, bu gün AXCP sədri Əli Kərimlinin evində axtarış aparılıb.

***

14:57

Azərbaycan Xalq Cəbhəsi Partiyasının (AXCP) sədri Əli Kərimlinin saxlanıldığı barədə məlumat yayılıb.

Məlumatı sosial şəbəkədə partiyanın nümayəndəsi Saqif Qurbanov yayıb.

Əli Kərimlinin saxlanılma səbəbi barədə məlumat verilməyib. Hüquq-mühafizə orqanları əməkdaşlarının onun evində axtarış apardığı bildirilir.

Yerli mətbuatın xəbərinə görə, bu, DTX-da aparılan araşdırma çərçivəsində həyata keçirilib.

Belə ki, Əli Kərimlinin evində bir qədər əvvəl axtarış aparılması Ramiz Mehdiyevin DTX-də istintaq olunan cinayət işi ilə əlaqədardır.

Xatırladaq ki, hazırda Ramiz Mehdiyev Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunur. Bakı şəhəri Səbail rayon məhkəməsi Mehdiyev Ramiz Ənvər oğlu barədə cinayət işi üzrə bu il oktyabrın 14-də qərar qəbul edib. Qərara əsasən, məhkəmə xüsusilə ağır cinayət əməllərinə görə cinayət məsuliyyətinə cəlb edilmiş Ramiz Mehdiyev barədə verilmiş vəsatəti təmin edərək, 4 ay müddətinə ev dustaqlığı qətimkan tədbiri seçib.

Digər məlumata görə, AXCP Rəyasət Heyətinin üzvü Məmməd İbrahim də polislər tərəfindən saxlanılıb.

AXCP-dən geniş məlumat yayılacağı bildirilib.