Məsud Pezeşkian Armen Qriqoryanı qəbul edib

15:41

İran Prezidenti Məsud Pezeşkian avqustun 30-da Tehranda Ermənistan Təhlükəsizlik Şurasının katibi Armen Qriqoryanı qəbul edib.

Bu barədə İran KİV-ləri məlumat yayıb.

Onlar Tehran və İrəvan arasında ikitərəfli münasibətləri, iki ölkə arasındakı ticarət dövriyyəsinin artırılmasını, regional prosesləri müzakirə ediblər.

Bildirilib ki, M.Pezeşkian və A.Qriqoryan Şimal-Cənub nəqliyyat dəhlizi barədə müzakirə aparıblar. 

A.Qriqoryan görüşdə bildirib ki, İrəvan Tehran ilə strateji əməkdaşlıq haqqında hərtərəfli sənəd imzalamağa hazırdır. Təhlükəsizlik Şurasının katibi, həmçinin İran şirkətlərinin Ermənistanda fəal iştirakını qeyd edib. O əlavə edib ki, Ermənistan İranləa ticarət həcmini bir neçə dəfə artırmağa hazırdır.

M.Pezeşkian isə öz növbəsində, İrəvana son səfərinin nəticələrindən məmnunluğunu ifadə edib, onu uğurlu və məhsuldar adlandırıb.

***

15:28

Ermənistanın Təhlükəsizlik Şurasının katibi Armen Qriqoryan İranın Ali Milli Təhlükəsizlik Şurasının katibi Əli Laricaniyə avqustun 8-də Vaşinqtonda ABŞ, Azərbaycan və Ermənistan liderlərinin iştirakı ilə imzalanmış sənədlər barədə məlumat verib. 

Bu barədə Ermənistan KİV-i məlumat yayıb.

A.Qriqoryan, xüsusilə, regionda iqtisadi infrastrukturun açılmasının hansı prinsiplə həyata keçiriləcəyini izah edib.

Ə.Laricani, öz növbəsində, Ermənistan və Azərbaycan arasında sülhün qurulmasına yönəlmiş razılaşmaları alqışlayıb, Cənubi Qafqazda sabitliyin və təhlükəsizliyin təmin edilməsinin vacibliyini vurğulayıb.

Qeyd edək ki, Vaşinqton sammitində Azərbaycan və Ermənistan liderlərinin Birgə Bəyannaməsi imzalanıb, iki ölkənin XİN başçıları həmçinin "Sülh və dövlətlərarası münasibətlərin qurulması haqqında Saziş"i paraflayıblar, həmçinin Minsk qrupunun və onunla əlaqəli təsisatların ləğvi ilə bağlı ATƏT-ə müraciət imzalayıblar.

***

10:56

İranın Ali Milli Təhlükəsizlik Şurasının katibi Əli Laricani və Ermənistanın Təhlükəsizlik Şurasının katibi Armen Qriqoryan Tehranda görüş keçiriblər.

Tərəflər ikitərəfli münasibətləri və regional prosesləri müzakirə ediblər.

Görüşün digər təfərrüatları açıqlanmayıb.