ANSTV
ANSÇM
HƏMAS lideri Tehranda öldürüldü FOTO
O, İranın yeni seçilən prezidentinin andiçmə mərasimində iştirak etmək üçün Tehrana səfər etmişdi
1 dəqiqə
Fələstinin HƏMAS hərəkatının siyasi bürosunun rəhbəri İsmayıl Haniyə öldürülüb.
Bu barədə İranın "Tasnim" agentliyi məlumat yayıb.
Məlumata görə, Haniyə və daha bir nəfər iqamətgahın atəşə tutulması nəticəsində ölüb.
Məlumatı HƏMAS-ın özü də təsdiqləyib. Hərəkatın teleqram kanalında bildirilb ki, İranın yeni seçilən prezidenti Məsud Pezeşkianın andiçmə mərasimində iştirak etmək üçün Tehrana səfər edən Haniyə İsrailin hücumuna məruz qalıb.
Haniyənin yerli vaxtla təxminən 02.00-da qaldığı yerə raket zərbəsi endirilməsi nəticəsində öldüyü bildirilir. HƏMAS rəsmi bəyanatında Siyasi Büro rəhbərinin ölümünü təsdiqləyərək, insidentdə İsraili günahlandırıb.
İran İnqilab Keşikçiləri Korpusu (SPEAH) Haniyənin ölkənin yeni prezidentinin andiçmə mərasiminə qatıldıqdan bir neçə saat sonra öldüyünü təsdiqləyib, araşdırma apardıqlarını bildiriblər.
İsrail ordusunun nümayəndələri CNN-ə Haniyənin İranda öldürülməsini şərh etmək istəməyiblər.
Qeyd edək ki, Pezeşkianın andiçmə mərasimi ötən gün keçirilib.
