İrəvanda ATƏT PA-nın payız sessiyası başladı

Azərbaycan nümayəndə heyəti İrəvana getməkdən imtina edib

Oxuma müddəti:

1 dəqiqə

Noyabrın 18-də İrəvanda ATƏT PA-nın payız sessiyası işə başlayıb.

Ermənistan KİV-i xəbər verir ki, Karen Dəmirçyan adına İdman-Konsert Kompleksində keçirilən sessiya noyabrın 20-dək davam edəcək.

Avropada Təhlükəsizlik və Əməkdaşlıq Təşkilatının Parlament Assambleyasının payız sessiyası “ATƏT böhran anlarında: Parlament Assambleyasının daxili və xarici çağırışlara qarşı mübarizədə rolu” devizi ilə keçirilir.

Ermənistan 57 üzv dövlətin nümayəndə heyətlərindən 300-ə yaxın deputat qəbul edir.

Sessiyada Cənubi Qafqaz regionu ilə bağlı məsələlər də müzakirə olunacaq, ikitərəfli görüşlər təşkil ediləcək.

Qeyd edək ki, Azərbaycan nümayəndə heyəti İrəvana getməkdən imtina edib. Bununla bağlı Bakıdan ATƏT PA-ya göndərilən məktubda Azərbaycan tərəfinin Ermənistanda ölkəmizə qarşı hökm sürən düşmənçilik və nifrət hissindən, özünü qabarıq şəkildə büruzə verən antiazərbaycan təbliğatı və azərbaycanofobiyadan narahatlıq ifadə olunub.