ANSTV
ANSÇM
Kamçatkada qalan turistlər təxliyə olunur YENİLƏNİB
Tolbaçik vulkanı ərazisində qalan turistlər arasında Azərbaycan vətəndaşı da var
2 dəqiqə
10:41
Kamçatkadakı Tolbaçik vulkanı yaxınlığında ilişib qalan turistlərdən biri olan Azərbaycan vətəndaşı Tatyana Dolivets təxliyə olunduğunu elan edib. O, bu barədə sosial mediada məlumat paylaşıb.
O, paylaşım edən, dua edən və onu dəstəkləyən hər kəsə dərin minnətdarlığını bildirib. Xüsusilə Azərbaycan vətəndaşlarına təşəkkür edib: "Sevimli ölkəmin sevimli vətəndaşlarının diqqətindən məyus oldum. Azərbaycan - təşəkkür edirəm!".
O, həmçinin Fövqəladə Hallar Nazirliyinə, Xarici İşlər Nazirliyinə, Azərbaycan səfirliyinə və Kamçatkadakı Azərbaycan diasporuna təşəkkür edib.
Regional hökumətin mətbuat xidməti xilasetmə əməliyyatının uğurla davam etdiyini bildirib. İnsanlar təhlükəsizdir və yardım alırlar.
Yenilənmiş məlumata görə, Tolbaçik vulkanının turizm marşrutunda ilişib qalan insanların ümumi sayı 149 nəfərdir. Bunlardan 117 nəfərin helikopterlə təxliyə edilməsi lazımdır. Qalanları isə öz avadanlıqları ilə yerində qalacaq və yolun təmizlənməsini gözləyəcək sürücülərdir.
***
09:03
Kamçatkada güclü yağışlar səbəbindən Tolbaçik vulkanı ərazisində qalan turistlərin təxliyəsinə başlanılıb.
Kamçatka diyarı hökuməti xəbər verir ki, turistlərin helikopterlərlə təxliyəsi “Ölü meşə” (“Мертвый лес”) meydançasından həyata keçiriləcək. İnsanların buradan hava nəqliyyatı ilə avtomobil yoluna, daha sonra isə avtobuslarla Petropavlovsk-Kamçatskiyə çatdırılması planlaşdırılır.
Hazırda 79 turist qrup şəklində “Kleşnya” ərazisindən piyada “Ölü meşə” meydançasına doğru hərəkət edir.
Turistlərin Krapivnaya yol ayrıcından Petropavlovsk-Kamçatskiyə daşınması üçün üç avtobus göndərilib. Ümumilikdə 115-dək insanın təxliyə edilməsi nəzərdə tutulur.
Qeyd edək ki, vulkan ərazisində qalan turistlər arasında Azərbaycan vətəndaşı Tatyana Dolivets, eləcə də Rusiya, Çin, Belarus və İsrail vətəndaşları var.
Daha əvvəl Azərbaycanın Rusiyadakı səfirliyi və ölkəmizin Yekaterinburqdakı Baş Konsulluğu müvafiq yerli qurumlarla, eləcə də Kamçatkada fəaliyyət göstərən Azərbaycan icmasının nümayəndələri ilə əlaqə yaradıb və vəziyyəti diqqətdə saxlayır.
Turistlər güclü yağışlardan sonra çayın məcrasından çıxması nəticəsində nəqliyyat əlaqəsindən məhrum olublar. Daşqın nəticəsində yolun təxminən 30 kilometrlik hissəsi yuyulub.
