Keçən il Azərbaycan Türkiyəyə 3,8% çox qaz ixrac edib

Türkiyə Enerji Bazarının Tənzimlənməsi Şurasının (EPDK) məlumatına görə, 2025-ci ildə Azərbaycan Türkiyəyə 11 milyard 915,35 milyon kubmetr qaz ixrac edib ki, bu da 2024-cü illə müqayisədə 3,8% artım deməkdir.

Bu rəqəmə uzunmüddətli müqavilələr çərçivəsində tədarük edilən 11 milyard 524,83 milyon kubmetr və spot əsasda tədarük edilən 390,5 milyon kubmetr daxildir.

Dekabr ayında Türkiyəyə Azərbaycan qazının tədarükü əvvəlki illə müqayisədə 4,17% artımla 1 milyard 80,66 milyon kubmetr təşkil edib. Bütün bu həcm uzunmüddətli müqavilələr hesabına formalaşıb.

Ümumilikdə, Türkiyə dekabr ayında 7 milyard 654,24 milyon kubmetr qaz idxal edib (artım 3,94%). Bunun 3 960,45 milyon kubmetri boru kəməri qazının (bütün tədarükün 51,74%-i, azalma 10,49%), mayeləşdirilmiş təbii qazın (LNG) isə 3 693,79 milyon kubmetri (bütün tədarükün 48,26%-i, artım 25,66%) təşkil edib.

Dekabr ayında tədarük həcminə görə Azərbaycan üçüncü yerdə qərarlaşıb (Türkiyəyə ümumi tədarükün 14,12%-i). ABŞ birinci yerdə (30,33%), Rusiya ikinci yerdə (30,1%), İran dördüncü yerdə (7,53%) və Əlcəzair beşinci yerdə (6,27%) qərarlaşıb.

Dekabr ayında Türkiyəyə 13 ölkədən qaz tədarük edilib: Azərbaycan, Rusiya və İrandan boru kəmərləri vasitəsilə; Əlcəzair, Anqola, ABŞ, Misir, Seneqal, Ekvatorial Qvineya, Kamerun, Nigeriya, Norveç və Trinidad və Tobaqodan isə LNG şəklində.

Şahdəniz yatağının işlənməsinin 1-ci və 2-ci mərhələlərində hasil edilən Azərbaycan qazı Türkiyəyə tədarük olunur.