Suriya Prezidenti Əhməd əl-Şaraa Moskvada səfərdədir

Bu gün Suriya lideri Rusiya Prezidenti Vladimir Putinlə görüşəcək

Oxuma müddəti:

1 dəqiqə

Suriya Prezidenti Əhməd əl-Şaraa Moskvaya gedib.

Suriya liderinin təyyarəsi "Vnukovo" hava limanına enib.

Kremlin rəsmi nümayəndəsi Dmitri Peskov bildirib ki, Rusiya Prezidenti Vladimir Putin və Suriya lideri Əhməd əl-Şaraa işgüzar səhər yeməyi və ayrıca görüş çərçivəsində danışıqlar aparacaqlar.

Peskov deyib ki, Rusiya hərbçilərinin Qamışlıdakı aerodromdan çıxarılması məsələsi Rusiya Müdafiə Nazirliyinin səlahiyyətindədir.

Onun sözlərinə görə, Vladimir Putin və Əhməd əl-Şaraa Rusiya qoşunlarının Suriyadakı mövcudluğunu müzakirə edəcəklər.

“Silahlı Qüvvələrimizin Suriya Ərəb Respublikasında yerləşdirilməsi məsələlərinə gəlincə, bu, Müdafiə Nazirliyinin səlahiyyətindədir”, - Peskov bununla bağlı Müdafiə Nazirliyinə müraciət olunmasını tövsiyə edib.

Peskov Dəməşqin Bəşər Əsədin ekstradisiyası tələbi ilə bağlı sualı da şərh etməyib.

Xatırladaq ki, bu, Əhməd əl-Şaraanın Rusiyaya ikinci səfəridir.