Tramp C5+1 görüşündə TRIPP layihəsindən danışıb

ABŞ Prezidenti Donald Tramp Mərkəzi Asiya ölkələrinin liderləri ilə keçirilən C5+1 işgüzar şam yeməyi zamanı TRIPP (Beynəlxalq Sülh və Rifah üçün Tramp Marşrutu) layihəsinin əhəmiyyətindən danışıb.

Tramp layihənin region üçün mühüm iqtisadi potensiala malik olduğunu vurğulayıb. “Üç ay əvvəl administrasiyam Ermənistan və Azərbaycan arasında tarixi sülh sazişi imzaladı — bu, səkkiz ayda sona çatdırdığımız səkkiz münaqişədən biridir”, – deyə ABŞ Prezidenti qeyd edib.

O, TRIPP marşrutunun strateji və iqtisadi baxımdan əhəmiyyətinə diqqət çəkərək bildirib ki, bu yeni yol dünyanın vacib ticarət istiqamətlərindən keçəcək və Xəzər dənizi regionunda iqtisadi fəallığı artıracaq.

“Mən inanıram ki, bu razılaşma Mərkəzi Asiya ölkələrinin inkişafına real töhfə verəcək. Əgər bu gün burada olan hər bir dövlət təqdim etdiyimiz fürsəti dəyərləndirsə, sülhün və rifahın faydalarından tam yararlana biləcək”, – deyə Tramp əlavə edib.

Ağ Evdə keçirilən Orta Asiya Zirvə Görüşündə Tramp Qazaxıstan Prezidenti Kasım-Jomart Tokayev, Özbəkistan Prezidenti Şavkat Mirziyoyev, Tacikistan Prezidenti Emoməli Rəhman, Qırğızıstan Prezidenti Sadir Japarov və Türkmənistan Prezidenti Serdar Berdimuhammedov ilə görüşüb.