"Transxəzər Müəssisə Fondu"nun sədri Sokolov kimdir?

ABŞ regiondakı təsirini genişləndirərkən, Trampın tərəfdarı Ermənistandakı mis sektoruna sərmayə qoyur

Prezident Donald Trampın administrasiyası ilə əlaqələri olan, Sovet İttifaqında doğulmuş ABŞ investoru Ermənistandakı mis investisiyalarını genişləndirməyi planlaşdırır. O, Vaşinqtonun iqtisadi mövcudluğunu gücləndirməyə çalışdığı bir vaxtda, regionun daha geniş şəkildə açılacağına ümid bəsləyir.

Sentyabr ayında Ermənistanın ikinci ən böyük mis istehsalçısını satın alan Konstantin Sokolov Bloomberg-ə müsahibəsində bildirib: "Ermənistan və Azərbaycan arasında imzalanmış sülh memorandumu region üçün tarixi, köklü dəyişikliklərə səbəb olacaq bir hadisədir. Mən fəaliyyətimi bütün regiona yaymaqda çox maraqlıyam, çünki onun ümumi potensialına dərindən inanıram".

Bu addım ABŞ-ın Cənubi Qafqazda daha fəal iştirakına yol açır; buna "Beynəlxalq Sülh və Rifah üçün Tramp Marşrutu" (Trump Route for International Peace and Prosperity – TRIPP) adlanan tranzit dəhlizi təklifi də daxildir.

ABŞ Qafqaz və Mərkəzi Asiyada ticarəti artırmaq, kritik mineralları təmin etmək və uzun müddət Rusiya ilə Çinin dominantlığı altında olmuş regionlarla iqtisadi əlaqələr qurmaqla öz təsirini genişləndirir. Bu çərçivədə, TRIPP dəhlizi Ermənistan və bir Amerika şirkəti tərəfindən birgə idarə olunacaq.

Sokolovun "Teghut" QSC mis istehsalçısını əldə etməsi ABŞ-ın bu istiqamətdəki səyləri ilə üst-üstə düşür və o, Tramp administrasiyasının regiondakı fəaliyyətləri ilə əlaqəli bir sima kimi ortaya çıxıb.

51 yaşlı Sokolov bu il "Transxəzər Müəssisə Fondu"nun (Transcaspian Enterprise Fund) sədri olub. ABŞ tərəfindən dəstəklənən bu qeyri-kommersiya investisiya qurumu, infrastruktur və biznes layihələrinə özəl kapital cəlb etməyi hədəfləyir. ABŞ hökumətinin 201 milyon dollar maliyyə dəstəyi ilə fəaliyyət göstərən fond, TRIPP-in və Ermənistan, Azərbaycan, Gürcüstan, eləcə də Mərkəzi Asiyanın beş ölkəsini əhatə edən daha geniş Transxəzər ticarət dəhlizinin inkişafına diqqət yetirəcək.

Sokolov bildirib ki, o və idarə heyətinin digər üzvləri bu fəaliyyətə görə heç bir ödəniş almırlar. Onun sözlərinə görə, fondun rəhbərliyi seçilərkən onların özəl kapital sahəsindəki təcrübəsi, həmçinin region və investisiya qoyulması planlaşdırılan sektorlar haqqındakı bilikləri əsas götürülüb.

Sokolov qeyd edib ki, təxminən 3,1 milyon əhalisi olan bu ölkədəki imkanları hələ 2021-ci ilin sonlarında fərq etməyə başlayıb; o, ölkənin iqtisadi sıçrayış ərəfəsində olduğuna inanırdı. Sokolov, mərkəzi Moskvada yerləşən "VTB Bank PJSC"-dən "Teghut"u əldə etmək üçün Rusiya və Çin şirkətləri ilə rəqabət aparıb, lakin 228,5 milyon dollarlıq təklifi ilə qalib gəldiyini bildirib.

O, sanksiya tətbiq edilmiş Rusiya maliyyə qurumundan bu mədəni almaq üçün ABŞ Maliyyə Nazirliyinin Xarici Aktivlərə Nəzarət Ofisindən (OFAC) icazə alıb.

İllik təxminən 80 000 ton konsentrat istehsal gücünə malik olan "Teghut"da istehsal prosesinə 2014-cü ildə başlanılıb.

İndiyədək istehsal olunan məhsulun böyük hissəsi Çinə satılıb. Sokolov, mövcud satış müqaviləsinin dekabr ayında başa çatmasından sonra, yeni ticarət sazişləri vasitəsilə məhsul axınını ABŞ-a yönəltməyi planlaşdırır.

O qeyd edib: "Bu sövdələşmənin əsas məqsədlərindən biri Ermənistanın kritik mineral ehtiyatlarını ABŞ-ın təchizat zəncirləri üçün əlçatan etmək idi".

Sokolov illik istehsal həcmini 120 000–130 000 ton mis konsentratına (tərkibində təxminən 26 000–28 000 ton mis olmaqla) çatdırmağı planlaşdırır. Onun sözlərinə görə, yeni istehsal güclərinin 2030-cu ildə istifadəyə verilməsi, 2031-ci ildə isə tam gücü ilə işləməsi gözlənilir.

İş adamı bildirib ki, o, daha geniş regionda kritik infrastruktura – xüsusilə elektrik ötürücü xətlərə, boru kəmərlərinə, enerji istehsalı obyektlərinə və kritik minerallara aid layihələri nəzərdən keçirir.