Türkiyədə məşhur universitet fəaliyyətini dayandırdı

Türkiyədə İstanbul Bilgi Universitetinin fəaliyyət icazəsi ləğv edilib.

Bununla bağlı qərar Türkiyənin “Resmi Gazete” nəşrində dərc olunub.

Türkiyə Prezidenti Rəcəb Tayyib Ərdoğanın imzası ilə yayımlanan qərara əsasən, təsisçi fonduna qəyyum təyin edilən İstanbul Bilgi Üniversitesinin fəaliyyət icazəsi “Yüksək Təhsil Qanunu”nun əlavə 11-ci maddəsinə uyğun olaraq ləğv olunub.

Qərarda universitetin fəaliyyətinin dayandırılması ilə bağlı digər detallara yer verilməyib.

Qeyd edək ki, İstanbul Bilgi Universiteti 7 iyun 1996-cı ildə Bilgi Təhsil və Mədəniyyət Fondu tərəfindən təsis edilib. Onun təsisçiləri arasında Oğuz Özerden, Latif Mutlu, Prof. Dr. Asəf Savaş Akat, Prof. Dr. Toktamış Ateş və Murat Belge kimi tanınmış alimlər, iş adamları və ziyalılar var idi. Bu, Türkiyənin dördüncü özəl universiteti idi.

2019-cu ildə "Laureate" qrupu Türkiyədən çıxmaq qərarına gəldi və İstanbul Bilgi Universiteti təxminən 90 milyon dollara "Can" Holdinqə (Kamal Canın özəl şirkəti olan "Can" Beynəlxalq İnvestisiya Holdinq A.Ş.) köçürüldü. Bu transferlə Can ailəsi Bilgi Mədəniyyət və Təhsil Fondunun əsas dəstəkçisinə çevrildi.

Lakin 2025-ci ilin sentyabr ayında istintaq çərçivəsində "Can" Holdinqə qarşı əməliyyat başladıldı və TMSF (Əmanətlərin Sığorta Fondu) tərəfindən Bilgi Universitetini holdinqin tabeliyindəki şirkətlərlə birlikdə idarə edən "Doğa Bilgi Məktəbləri" İdarəetməsinə bir qəyyum təyin edildi.

İstanbul Bilgi Universiteti “Resmi Gazete”də dərc olunmuş prezident fərmanı ilə rəsmi olaraq bağlandı. Qəyyumluq altında olan təhsil müəssisəsi, bu son qərarla fəaliyyəti dayandırılan təməl universitetlər sırasına qoşulur.