Ukrayna münaqişəsi ərazi bütövlüyünün vacibliyini vurğuladı

Bunu Dövlət Departamentinin mətbuat katibinin müavini Vedant Patel deyib

Oxuma müddəti:

1 dəqiqə

Dövlət Departamenti bildirib ki, Ukraynadakı münaqişə bu çərşənbə günü başlayacaq Demokratiya Sammitində mühüm müzakirə mövzusu olacaq.

Dövlət Departamentinin mətbuat katibinin müavini Vedant Patel bazar ertəsi brifinq zamanı TURANın müxbirinin sualını cavablandırarkən deyib: “Əlbəttə, Rusiyanın Ukraynaya qəddar hücumu, şübhəsiz ki, müzakirə mövzusu olacaq”.

Dövlət katibi Entoni Blinken bu gün Ukrayna prezidenti Vladimir Zelenski ilə “Ukraynada ədalətli və davamlı sülh” mövzusunda virtual sessiya keçirir.

"Ukraynadakı münaqişə və müharibə BMT Nizamnaməsinə, ərazi bütövlüyü və suverenlik prinsipinə riayət edilməsinin və hörmət edilməsinin vacibliyini vurğuladı", - Patel bildirib.

"Bu əsrin həlledici sualı demokratiyaların bu dəyişən dünyada öz xalqına fayda verməyə davam edib-etməyəcəyidir" dedi.

Demokratiya Sammitində 120 ölkə, vətəndaş cəmiyyəti qrupları və texnologiya şirkətləri, eləcə də insan haqları qruplarının demokratiyanın vəziyyəti ilə bağlı narahatlıqlarını ifadə etdikləri ölkələr iştirak edəcək.