Xaçmazda çökmüş körpünün yerində yenisi tikiləcək

Bu barədə Azərbaycan Avtomobil Yolları Dövlət Agentliyi məlumat yayıb

Oxuma müddəti:

1 dəqiqə

Bu gün səhər saatlarında Xaçmaz rayonunda təbii fəlakət nəticəsində çökmüş körpünün yerində yeni avtomobil körpüsünün inşası qərara alınıb.

Bu barədə Azərbaycan Avtomobil Yolları Dövlət Agentliyi məlumat yayıb.

Agentliyin mətbuat xidmətinin rəhbəri Anar Nəcəfli "anspress"-ə bildirib ki, bu gündən köhnə körpünün söküntüsünə başlanılıb və yaxın 2-3 aya yeni körpü inşa olunub istifadəyə veriləcək.

Anar Nəcəfli hələ ki, layihəyə nə qədər vəsait xərclənəyini bilmir: "Hələ layihələndirilir".

Xatırladaq ki, intensiv yağıntılar nəticəsində yaranmış güclü sel suları respublika əhəmiyyətli Gəndob-Xaçmaz-Yalama-Rusiya ilə dövlət sərhədi avtomobil yolunun 27-ci km-də, Qüdyalçay üzərində yerləşən və 1974-cü ildə inşa edilmiş avtomobil körpüsündə çökməyə səbəb olub. Yeni körpünün inşası ilə əlaqədar günorta saatlarında əraziyə xüsusi texnikalar cəlb ediləcək. İnşaat işlərinin qısa müddət ərzində həyata keçirilməsi nəzərdə tutulub.

Sürücülər müvəqqəti olaraq alternativ yol kimi Xaçmaz rayonu, Qımılqışlaq kəndi ərazisindən keçən yoldan istifadə edə bilərlər.