Üç ölkənin hərbi rəhbərliyi Xocavənddəki təlimdə VİDEO
Azərbaycan, Türkiyə və Özbəkistan müdafiə nazirləri “Birliyin Gücü - 2026” təliminin "Yüksək Səviyyəli Müşahidəçi Günü"ndə YENİLƏNİB
16:35
“Birliyin Gücü – 2026” birgə hərbi təlimi çərçivəsində oktyabrın 1-də Xocavənd rayonunun Qızılqaya Təlim Mərkəzində müxtəlif döyüş tapşırıqları icra olunub.
VİDEO
Təlimdə iştirak edən Azərbaycan, Türkiyə və Özbəkistan hərbi qulluqçuları hibrid təhdidlərə və terror fəaliyyətlərinə qarşı mübarizə, yaşayış məntəqələrində antiterror əməliyyatlarının keçirilməsi, müştərək planlaşdırma və qanunsuz silahlı qruplaşmaların zərərsizləşdirilməsi üzrə tapşırıqları birgə yerinə yetiriblər.



Təlimin əsas məqsədi iştirakçı ölkələrin orduları arasında əməkdaşlığın genişləndirilməsi, şəxsi heyətin praktiki vərdişlərinin təkmilləşdirilməsi, təcrübə mübadiləsi, bölmələr arasında qarşılıqlı fəaliyyətin gücləndirilməsi, dayanıqlı sülh və təhlükəsizliyə töhfə verməkdir.
Təlim başlamazdan əvvəl qonaqlara onun məqsədi, ssenarisi, təhlükəsizlik qaydaları və icra ediləcək tapşırıqlar barədə məlumat verilib. Həmçinin birliyin idarəetmə məntəqəsi və “rəqəmsal ordu” konsepsiyası təqdim olunub.
Təlim zamanı kibertəhlükəsizliyin təmin edilməsi, kiberhəmlələrin aşkarlanması və zərərsizləşdirilməsi, dezinformasiyaya qarşı mübarizə, eləcə də PUA-lardan məlumatlandırma məqsədi ilə istifadə üzrə fəaliyyətlər nümayiş olunub.
Ssenariyə uyğun olaraq, terrorçuların mövqelərinə raket-artilleriya və aviasiya vasitələri, eləcə də PUA-larla zərbələr endirilib. Yandankeçmə dəstələri döyüş mövqelərini dövrələyərək ələ keçirib, əsas qüvvələrin əməliyyata cəlb olunması üçün şərait yaradılıb.


Növbəti mərhələlərdə yaşayış məntəqəsinin bloklanması və terrorçulardan təmizlənməsi, nəzarət-buraxılış məntəqələrinin qurulması, humanitar minatəmizləmə, yaralıların tibbi təxliyəsi, mina sahələrindən və dağıntılardan keçidlərin açılması, körpünün qurulması və PUA hücumlarının qarşısının alınması üzrə tapşırıqlar icra olunub.
Təlimin ayrı-ayrı epizodlarının ölkənin müxtəlif bölgələrində keçirilməsi ilə əlaqədar qonaqların bütün prosesləri real vaxt rejimində izləməsi üçün iriölçülü monitorlar quraşdırılıb. Monitorlarda, həmçinin dövlət sərhədinin mühafizəsi, dəniz sərhədlərində əməliyyatlar, PUA hücumlarının qarşısının alınması, girovların azad olunması və dəniz desantının çıxarılması kimi epizodlar nümayiş etdirilib.
Təlim çərçivəsində aviasiya və artilleriya sistemlərinin praktiki tətbiqi, real atışlar, bölmələrin taktiki fəaliyyəti və çoxmillətli əməliyyatlarda qarşılıqlı fəaliyyət məsələləri də işlənilib.
“Birliyin Gücü – 2026” təlimi iştirakçı ölkələrin hərbi qulluqçuları arasında qarşılıqlı fəaliyyətin və təcrübə mübadiləsinin gücləndirilməsinə, birgə əməliyyatlara hazırlığın və bölmələrin koordinasiyasının artırılmasına xidmət edir.
Sonda “Birliyin Gücü – 2026” birgə hərbi təliminin uğurla başa çatdırılmasında fəal iştirak edən, qarşıya qoyulmuş tapşırıqların icrasında yüksək peşəkarlıq və hazırlıq nümayiş etdirən bir qrup hərbi qulluqçu təltif olunub.


***
15:59
Bu təlimlərdə iştirak edən bütün şəxsi heyət yüksək peşəkarlıq nümayiş etdirdi. Həm quru əməliyyatları, həm dəniz əməliyyatları, həm də havadan zərbələr - hamısı uğurla həyata keçirildi və şəxsi heyət yüksək peşəkarlıq nümayiş etdirdi.
Bunu Azərbaycanın müdafiə naziri general-polkovnik Zakir Həsənov Xocavənd rayonunun Qızılqaya Təlim Mərkəzində keçirilən “Birliyin Gücü – 2026” birgə hərbi təliminin yekununda fərqlənən bir qrup hərbi qulluqçunun mükafatlandırılması mərasimində deyib.

"Əminəm ki, belə təlimlər iştirak edən hər üç ordunun xeyrinədir və döyüş hazırlığının daha yüksək səviyyədə təşkil edilməsinə dəstək olacaq. Xüsusi qeyd etmək istəyirəm ki, bu təlimlər regionda sülhün və sabitliyin təmin olunmasına yüksək səviyyədə töhfə verəcək",- deyə Zakir Həsənov vurğulayıb.
***
Azərbaycandan, Türkiyədən və Özbəkistandan olan qardaşlarımız həm planlaşdırılmasında, həm də icrasında mükəmməl bir təlimi uğurla başa çatdırdılar. İnanıram ki, bundan sonra digər qardaşlarımız – qırğızlar və qazaxlar da aramıza qoşulduqda daha böyük təlimləri birlikdə həm planlaşdıracaq, həm də uğurla həyata keçirəcəyik.
Bunu Türkiyənin milli müdafiə naziri Yaşar Gülər Xocavənd rayonunun Qızılqaya Təlim Mərkəzində keçirilən “Birliyin Gücü – 2026” birgə hərbi təliminin yekununda fərqlənən bir qrup hərbi qulluqçunun mükafatlandırılması mərasimində söyləyib.

O bildirib ki, bölgəmizdəki bütün vəziyyətləri nəzərə alaraq, “müharibəyə hazır ol” deməkdən başqa şansımız yoxdur. “Ən yaxşı şəkildə hazırlaşacağıq, amma sülh içində yaşayacağıq”, - deyə Yaşar Gülər vurğulayıb.
***
Bugünkü təlimdə hərbi qulluqçular yüksək döyüş hazırlığını, özlərinin peşəkarlığını, peşə hazırlığını və ən əsası əməkdaşlıq şəraitində döyüş tapşırıqlarını operativ şəkildə yerinə yetirmək bacarığını nümayiş etdirdilər.
Bunu Özbəkistanın müdafiə naziri general-leytenant Şuxrat Xalmuxamedov Xocavənd rayonunun Qızılqaya Təlim Mərkəzində keçirilən “Birliyin Gücü – 2026” birgə hərbi təliminin yekununda fərqlənən bir qrup hərbi qulluqçunun mükafatlandırılması mərasimində söyləyib.

O bildirib ki, bu təlim Azərbaycan, Türkiyə və Özbəkistan hərbi qulluqçuları arasında əməkdaşlığın və operativ uyğunlaşmanın artırılmasına, döyüş təcrübəsinin mübadiləsinə imkan yaradır.
***
13:58
Oktyabrın 1-də Xocavənd rayon ərazisində yerləşən Qızılqaya təlim mərkəzində “Birliyin Gücü - 2026” birgə hərbi təliminin "Yüksək Səviyyəli Müşahidəçi Günü" keçirilir.
Bu barədə Azərbaycanın Müdafiə Nazirliyi xəbər verib.
Azərbaycan Respublikasının müdafiə naziri general-polkovnik Zakir Həsənov və nazirliyin digər rəhbər heyəti ilə yanaşı iştirakçı və müşahidəçi ölkələrin müdafiə nazirləri, baş qərargah rəisləri, digər yüksək vəzifəli qonaqlar, həmçinin yerli və xarici media nümayəndələri "Yüksək Səviyyəli Müşahidəçi Günü"ndə iştirak etmək məqsədilə təlim mərkəzinə səfər ediblər.
Qonaqlar təlim çərçivəsində təşkil olunan sərgidə Azərbaycan Ordusunun arsenalına yeni qəbul edilmiş və təlimdə istifadə olunan silah, texnika, insansız sistemlər, aviasiya vasitələri və digər xüsusi hərbi avadanlıqlarla tanış olublar.
VİDEO
Daha sonra yüksək səviyyəli qonaqlar təlimin növbəti mərhələlərini və praktiki fəaliyyətləri izləyəcəklər.
***
13:17
Türkiyənin müdafiə naziri Yaşar Güler Azərbaycanın ev sahibliyi etdiyi, Türkiyə və Özbəkistanın iştirakı ilə keçirilən “Birliyin Gücü-2026” təliminin “Yüksək Səviyyəli Müşahidəçi Günü”ndə iştirak edir.
Türkiyə Milli Müdafiə Nazirliyi xəbər verir ki, Yaşar Güler Baş Qərargah rəisi, ordu generalı Səlcuq Bayraktaroğlu, Hərbi Dəniz Qüvvələri komandanı admiral Ercüment Tatlıoğlu, Quru Qoşunları komandanı ordu generalı Metin Tokel və Hərbi Hava Qüvvələri komandanı ordu generalı Rafet Dalkıranla birlikdə Şuşada təlimin keçirildiyi əraziyə gedib.
Yaşar Gülər Azərbaycanın müdafiə naziri general-polkovnik Zakir Həsənovla birlikdə təlim ərazisində nümayiş etdirilən və təlim zamanı istifadə olunan silah, sursat və texnikalara da baxış keçirib.



***
11:57
“Birliyin Gücü-2026” birgə hərbi təlimi çərçivəsində oktyabrın 1-də Azərbaycan Ordusunun arsenalına yeni qəbul olunan və hazırda istifadədə olan silah və hərbi texnikanın sərgisi təşkil edilib.
Sərgi Xocavənd rayonunun Qızılqaya Təlim Mərkəzində keçirilib.
Sərgidə Azərbaycanın müdafiə naziri, general-polkovnik Zakir Həsənov, Türkiyənin milli müdafiə naziri Yaşar Güler və Özbəkistanın müdafiə naziri general-leytenant Şuxrat Xalmuxamedov baxış keçiriblər.
Təqdim edilən silah və hərbi texnikanın bir qismindən təlim çərçivəsində keçirilən praktiki məşqlər zamanı da istifadə olunub.
Sərgidə müxtəlif növ silah sistemləri və hərbi texnika, o cümlədən ağır artilleriya qurğuları, radar əleyhinə sistemlər, toplar və pilotsuz uçuş aparatları nümayiş etdirilib.
Bununla yanaşı, tanklar, zirehli döyüş maşınları, hərbi yük və xüsusi təyinatlı texnika, müxtəlif atıcı silahlar, pilotsuz uçuş aparatları, eləcə də müşahidə-kəşfiyyat avadanlıqları təqdim olunub.
***
09:23
Xocavənd rayonunda “Birliyin Gücü – 2026” birgə hərbi təlimi keçirilir.
Müdafiə Nazirliyinin Mətbuat və İctimaiyyətlə Əlaqələr İdarəsinin rəisi Anar Eyvazov brifinqdə bildirib ki, bu, Azərbaycanda azad edilmiş ərazilərdə keçirilən ilk belə genişmiqyaslı hərbi təlimdir.
Onun sözlərinə görə, təlimdə hibrid müharibələrin xüsusiyyətləri nümayiş etdirilir.
Təlimə Azərbaycanla yanaşı, Türkiyə və Özbəkistanın hərbi qulluqçuları da cəlb olunub.
İran, Slovakiya, Qırğızıstan, Tacikistan, Gürcüstan, Pakistan, Türkmənistan, Serbiya və Birləşmiş Ərəb Əmirlikləri isə müşahidəçi qismində iştirak edir.
Anar Eyvazov qeyd edib ki, təlimdə 3579 nəfər şəxsi heyət, 135 pilotsuz vasitə, 76 zirehli texnika, 94 artilleriya sistemi, 27 aviasiya vasitəsi, 34 REM/REK/RL sistemi, 18 hava hücumundan müdafiə vasitəsi, 8 dəst mühəndis texnikası və 25 dəniz vasitəsi iştirak edir.
11 dəqiqə