ABŞ Konqresi Bakı üçün Cekson-Venik Düzəlişini ləğv edəcək?

ABŞ Konqresi Azərbaycan və Orta Asiya ölkələri üçün Cekson-Venik Düzəlişinin ləğv edilməsinə çağırıb.

ABŞ regionla ticarət və iqtisadi əməkdaşlığın genişləndirilməsindəki maneələri aradan qaldırmaq üçün Azərbaycan və Orta Asiya ölkələri üçün Cekson-Vanik Düzəlişini ləğv etməlidir. Bu barədə ABŞ Nümayəndələr Palatasının Yollar və Vasitələr Komitəsinin dinləməsində ekspertlər bildiriblər.

Qeyd edək ki, 1974-cü ildə qəbul edilmiş Cekson-Vanik Düzəlişi Sovet yəhudilərinin mühacirətini təşviq etmək üçün SSRİ-yə ticarət məhdudiyyətləri tətbiq edirdi. SSRİ-nin dağılmasından sonra qanunvericilik bir neçə keçmiş sovet respublikası üçün qüvvədə qaldı. Hazırda düzəliş hələ də Azərbaycan, Qazaxıstan, Tacikistan, Türkmənistan və Özbəkistana şamil olunur.

Atlantik Şurasının Avrasiya Mərkəzinin baş direktoru Con Herbst bildirib ki, Cekson-Vanik Düzəlişinin saxlanılması ABŞ-ın bu ölkələrlə daha sıx əlaqələrinin inkişafına mane olur. O, ticarət məhdudiyyətlərini birdəfəlik aradan qaldırmaq üçün qanunvericilik tədbirlərinin görülməsinin vacibliyini və Vaşinqtonun bu maneəni aradan qaldırmalı olduğunu iddia edib.

Herbst həmçinin regional nəqliyyat əlaqələrinin inkişafını qeyd edib. Onun sözlərinə görə, TRIPP təşəbbüsü — "Beynəlxalq Sülh və Rifah üçün Tramp Marşrutu" — Cənubi Qafqazda sülhün möhkəmləndirilməsi və münasibətlərin normallaşdırılması üçün iqtisadi stimullar yarada bilər.

"Amerika İmperativi: Qlobal Liderliyin Yumşaq Güclə Bərpası" kitabının müəllifi Daniel Randi Azərbaycanın strateji əhəmiyyətini vurğulayaraq, ölkəni Mərkəzi Asiya və Xəzər regionunu Qərb bazarları ilə birləşdirən həyati körpü adlandırıb. Randi həmçinin TRIPP təşəbbüsünün və təxminən 30 ildir müzakirə olunan Transxəzər Qaz Boru Kəmərinin potensialını qeyd edib. O bildirib ki, belə bir layihənin həyata keçirilməsi ABŞ-da qaz tədarükünün artmasına və potensial olaraq qaz qiymətlərinin aşağı düşməsinə töhfə verə bilər.

Randinin sözlərinə görə, dəmir yollarının, yolların, limanların və fiber-optik rabitənin inkişafı region ölkələrinə Qərb bazarlarına çıxış üçün daha geniş imkanlar yaradacaq.