ABŞ və İran arasında danışıqlar başlayıb

17:34

"Son bir neçə gündə Livanda atəşkəsin təmin edilməsi istiqamətində əhəmiyyətli irəliləyişlər müşahidə etdik", - ABŞ-ın vitse-prezidenti C.D. Vens İsveçrədə bildirib ki, Livanda atəşkəsin təmin edilməsi istiqamətində irəliləyişlər əldə edilib.

Həmçinin, "Əl-Ərəbiyyə" qəzeti Pakistanın xarici işlər naziri İshaq Darın İranın Hörmüz boğazından keçən gəmilərə 60 gün ərzində tranzit rüsumları tətbiq etməyəcəyini bildirib.

***

16:43

Qətər Xarici İşlər Nazirliyi ABŞ, İran və Pakistan nümayəndələrinin iştirakı ilə yüksək səviyyəli komitənin ilk iclasının və danışıqların başlandığını açıqlayıb.

Bu barədə Qətər XİN məlumat yayıb.

Bildirilib ki, ABŞ, İran və iki vasitəçi ölkənin - Qətərin və Pakistanın nümayəndələrinin iştirak etdiyi sammit öz işinə başlayıb.

Doha ümid etdiyini bildirib ki, keçirilən görüşlər ABŞ və İran arasında imzalanmış qarşılıqlı anlaşma memorandumunda əks olunan bütün məsələləri əhatə edən hərtərəfli və uzunmüddətli razılaşmanın əldə olunmasına şərait yaradacaq.

Qətər Xarici İşlər Nazirliyinin rəsmi nümayəndəsi Məcid bin Məhəmməd əl-Ənsari qeyd edib ki, tərəflər yekun sazişin müddəalarının müzakirəsi üçün ixtisaslaşmış texniki işçi qrupları yaradıblar. Bundan əlavə, memorandumun müddəalarının icrasına nəzarət etmək məqsədilə monitorinq qrupları da formalaşdırılıb.

Diplomatın sözlərinə görə, bu addımlar bütün tərəflərin danışıqlar prosesini vicdanla və konstruktiv şəkildə irəlilətmək niyyətini nümayiş etdirir.

Əl-Ənsari, həmçinin Pakistanın tərəfdaş və vasitəçi kimi rolunu, Vaşinqton və Tehranın diplomatik həll yollarına sadiqliyini yüksək qiymətləndirib. O, eyni zamanda, Misir, Birləşmiş Ərəb Əmirlikləri, Səudiyyə Ərəbistanı və Türkiyənin danışıqlar prosesinə verdiyi dəstəyi xüsusi vurğulayıb.

***

15:47

İsveçrədə Qətər və Pakistanın vasitəçiliyi ilə ABŞ və İran arasında danışıqlar başlayıb.

Bu barədə Qətər Xarici İşlər Nazirliyi məlumat yayıb.

Qeyd edək ki, İran Xarici İşlər Nazirliyinin sözçüsü İsmayıl Bəqa bildirmişdi ki, bu gün səhər saatlarında İsveçrədə İran nümayəndə heyəti ilə prosesin vasitəçiləri qismində çıxış edən Pakistan və Qətər nümayəndə heyətləri arasında ikitərəfli görüşlər təşkil olunacaq. Günortadan sonra isə İran və ABŞ nümayəndə heyətləri arasında Qətər və Pakistan nümayəndələrinin iştirakı ilə dördtərəfli görüş keçiriləcək.