Azərbaycan Ermənistana hərbi yardımı məhdudlaşdırıb

Nazirlər Kabinetinin 2024-cü il üçün hökumətin fəaliyyəti haqqında hesabatında deyilir ki, Azərbaycan Avropa İttifaqı tərəfindən Ermənistana hərbi yardımın əhəmiyyətli dərəcədə məhdudlaşdırılmasına nail olub.

- Sənəddə qeyd olunur ki, 2024-cü ildə Azərbaycan ilə Aİ arasında münasibətlər Avropa İttifaqının Fransanın birbaşa təhriki ilə regiona qarşı birtərəfli və bölücü addımlar atması səbəbindən gərginliklə xarakterizə olunub.

- Azərbaycan Aİ-nin ölkəyə qarşı apardığı qarayaxma kampaniyasını neytrallaşdırmaq üçün lazımi tədbirlər görüb və tərəfdaşlarını Aİ vasitəsilə Ermənistanın hərbiləşdirilməsinin regional sülh və sabitlik üçün mənfi nəticələri, eləcə də Ermənistan və Azərbaycan arasında münasibətlərin normallaşması prosesinə mənfi təsiri barədə məlumat verib.

- Atılan addımlar nəticəsində Ermənistana göstərilən yardımın məzmunu və həcminin əhəmiyyətli dərəcədə məhdudlaşdırılmasına nail olmaq mümkün olub. İndiki mərhələdə Ermənistana öldürücü silah və texnikanın verilməsinin qarşısı alınıb. Bundan əlavə, Avropa Sülh Fondu (ASF) vasitəsilə Ermənistana yardımın göstərilməsi ilə paralel olaraq humanitar minatəmizləmə fəaliyyətləri üçün Azərbaycana 10 milyon avronun ayrılması ilə bağlı anlaşma əldə olunub.