Azərbaycan Premyer Liqasında X turun yekunları

23:00

Azərbaycan Premyer Liqasının X turunun bağlanış oyununda "Turan Tovuz" səfərdə "Sumqayıt"a qalib gəlib.

Mehdi Hüseynzadə adına Sumqayıt şəhər stadionunda baş tutan matçda qonaq komanda 4:2 hesablı qələbəyə sevinib.

Görüşdə hesabı 16-cı dəqiqədə qərb təmsilçisindən Alexandro Serrano açıb. 25-ci dəqiqədə Otto Con qonaqların üstünlüyünü iki topa çatdırıb. 1 dəqiqə sonra isə tovuzlular Veysəl Rzayevin sayəsində üçüncü qolu vurub. Meydan sahibləri 32-ci dəqiqədə Nikola Vuynoviçin dəqiq zərbəsi sayəsində fərqi azaltsa da, 78-ci dəqiqədə Aleks Souza "Turan Tovuz"un növbəti qolunu vurub. Yekun hesabı isə "gənclik şəhəri" təmsilçisinin heyətində 87-ci dəqiqədə Kamran Quliyev müəyyənləşdirib.

Bu qələbə sayəsində Kurban Berdıyevin rəhbərlik etdiyi komanda xallarının sayını 21-ə çatdıraraq turnir cədvəlində 2-ci sıraya yüksəlib. "Sumqayıt" isə 7 xalla 9-cu pillədə qalıb.

Qeyd edək ki, turun əvvəlki oyunlarında "Qarabağ" "Kəpəz"i 5:0, "Araz-Naxçıvan" "Şamaxı"nı 1:0, "Neftçi" isə "Səbail"i 3:1 hesabı ilə məğlub edib. "Zirə" - "Sabah" qarşılaşması 1:1 hesabı ilə yekunlaşıb.

***

19:30

Azərbaycan Premyer Liqasında X turun son oyun günündə "Zirə" "Sabah"ı qəbul edib.

Zirə Olimpiya İdman Kompleksində baş turan matçda 1:1 hesablı heç-heçə qeydə alınıb.

Görüşdə hesab 7-ci dəqiqədə açılıb. Cesse Sekidika meydan sahiblərinin qapısına yol tapıb.

Rəşad Sadıqovun rəhbərlik etdiyi kollektiv 90+1-ci dəqiqədə məğlubiyyətdən xilas olub. Georgi Papunaşvili "status-kvo"nu bərpa edib.

Bu bərabərlikdən sonra hər iki komandanın xal ehtiyatı 16-ya çatıb. "Zirə" turnir cədvəlində dördüncü, "Sabah" beşinci pillədə qərarlaşıb

Qeyd edək ki, turun əvvəlki oyunlarında "Qarabağ" "Kəpəz"i 5:0, "Araz-Naxçıvan" "Şamaxı"nı 1:0, "Neftçi" isə "Səbail"i 3:1 hesabı ilə məğlub edib.

***

10:00

Bu gün Azərbaycan Premyer Liqasında X tura yekun vurulacaq.

Turun son oyun günündə "Zirə" "Sabah"ı qəbul edəcək.

Komandalar müvafiq olaraq turnir cədvəlində 15 xalla dördüncü və beşinci pillələrdə qərarlaşıblar. Bu səbəbdən tərəflərin duelini 6 xallıq görüş kimi qiymətləndirmək olar. Zirə Olimpiya İdman Kompleksində baş tutacaq matçın start fiti saat 17:30-da səslənəcək.

Turun bağlanış qarşılaşması isə Mehdi Hüseynzadə adına Sumqayıt şəhər stadionunda yerli komanda ilə "Turan Tovuz" arasında reallaşacaq. I dövrəni 3-cü pillədə başa vuran qərb təmsilçisi uğurlu seriyanı davam etdirmək niyyətindədir. Doğma publika önündə çıxış edən "Sumqayıt" isə hazırkı yer aldığı 9-cu pillədən qurtulmaq üçün xal və ya xallar qazanmağa çalışacaq. Qarşılaşma saat 20:00-da başlayacaq.

Azərbaycan Premyer Liqası
II dövrə, X tur
20 oktyabr

17:30.“Zirə” – “Sabah”
Hakimlər: Rəşad Əhmədov, Vüsal Məmmədov, Zöhrab Abbasov, Əli Əliyev.
VAR: Elçin Məsiyev.
AVAR: Pərvin Talıbov.
Hakim-inspektor: Ceyhun Haşımov.
AFFA nümayəndəsi: Elçin Məmmədov.
Zirə Olimpiya İdman Kompleksi.

20:00.“Sumqayıt” – “Turan Tovuz”
Hakimlər: İnqilab Məmmədov, Namik Hüseynov, Rahil Ramazanov, Rauf Allahverdiyev.
VAR: Cavid Cəlilov.
AVAR: Müslüm Əliyev.
Hakim-inspektor: Rəhim Həsənov.
AFFA nümayəndəsi: Emin Cəfərov.
Mehdi Hüseynzadə adına Sumqayıt şəhər stadionu.

Qeyd edək ki, turun əvvəlki oyunlarında "Qarabağ" "Kəpəz"i 5:0, "Araz-Naxçıvan" "Şamaxı"nı 1:0, "Neftçi" isə "Səbail"i 3:1 hesabı ilə məğlub edib.