Ermənilərin Xudavəngdən oğurladıqları İnterpolda

Xudavəng monastırından ermənilər tərəfindən qanunsuz olaraq çıxarılan freskalar və xaçkarlar haqqında məlumatlar İnterpolun məlumat bazasına əlavə edilib.

Azərbaycan Mədəni İrsin Qorunması, İnkişafı və Bərpası üzrə Dövlət Xidmətinin rəisi Səbinə Hacıyeva AzSMI-ya verdiyi müsahibədə Xudavəngdəki erməni vandalizmi ilə bağlı vəziyyətdən danışıb.

Kəlbəcər rayonunun işğalından sonra Xudavəng monastırında da "bərpa" işləri başlanıb. Bu iş 1997-ci ildən 2011-ci ilə qədər Ermənistan Respublikası və Erməni Apostol Kilsəsi tərəfindən maliyyələşdirilib.

2014-cü ildən bəri monastırın unikal freskalarının "bərpası" da davam etdirilir. İşğalçı qüvvələr Kəlbəcər rayonundan çıxarkən Xudavəng monastır kompleksini talan edib, xaçlar, zənglər və kompleksə məxsus digər elementləri Ermənistan Respublikasına daşıyıblar. Onlar həmçinin divarlardan freskaları kəsib oğurladılar və sonradan müxtəlif sərgilərdə "erməni sənət əsərləri" kimi xaricdə nümayiş etdirildi.

Bu münasibətlə, 9 oktyabr 2025-ci ildə Xudavəng monastırından sökülərək ölkədən qanunsuz olaraq çıxarılan freska və xaçkarlar haqqında məlumat İnterpolun Oğurlanmış İncəsənət Məlumat Bazasına əlavə edildi. Bu, beynəlxalq hüquq-mühafizə mexanizmlərinin bu artefaktlar İnterpol üzvü olan dövlətin ərazisində tapıldığı təqdirdə onları Azərbaycan Respublikasına qaytarmaq üçün imkan yaradır.