Hakan Fidan Suriyaya səfər edib YENİLƏNİB

Bu barədə Türkiyənin Xarici İşlər Nazirliyi açıqlama yayıb

Oxuma müddəti:

2 dəqiqə

16:43

Türkiyə Prezidenti Rəcəb Tayyib Ərdoğanın yaxın gələcəkdə Suriyaya səfəri planlaşdırılır.

Bunu Suriyada səfərdə olan Türkiyənin xarici işlər naziri Hakan Fidan suriyalı həmkarı Əsəd Həsən Şeybani ilə birgə keçirdiyi mətbuat konfransında deyib.

Nazir bildirib ki, Suriyaya səfərinin əsas məqsədlərindən biri də Prezident Rəcəb Tayyib Ərdoğanın Suriya səfərinə hazırlıqla bağlı məsələləri müzakirə etməkdir. Səfərdən əvvəl Yüksək Planlaşdırma Qrupunun həyata keçirə biləcəyi işlər və hazırlıqlar nəzərdən keçirilib: “Prezidentimizin yaxın gələcəkdə Suriyaya həyata keçirməsi planlaşdırılan səfəri də müzakirə olunan məsələlər arasında idi. Özü bu səfəri çoxdan arzulayır. Biz də səfərin baş tutması üçün lazımi şəraitin yaradılması istiqamətində çalışırıq”.

***

13:27

Türkiyənin xarici işlər naziri Hakan Fidan Suriyaya səfərə gedib.

Bu barədə Türkiyənin Xarici İşlər Nazirliyi açıqlama yayıb.

Səfər çərçivəsində nazirlə suriyalı həmkarı Əsəd Həsən Şeybani arasında keçiriləcək görüşlərdə Suriyada davamlı sülh, sabitlik və rifahın təmin olunması, ikitərəfli əlaqələrin inkişafı, ticarət, enerji və nəqliyyat sahələrində əməkdaşlığın gücləndirilməsi müzakirə ediləcək.

Tərəflərin, həmçinin Suriyadakı inteqrasiya prosesi, Suriya Demokratik Qüvvələrinin (SDQ) özünü ləğv etməsi, ölkənin ərazi bütövlüyünün və dövlət qurumlarının gücləndirilməsi məsələlərini nəzərdən keçirməsi gözlənilir.

Görüşlərdə Suriyanın cənubundakı vəziyyət, eləcə də ölkənin təhlükəsizliyi və sabitliyi istiqamətində atılacaq addımların da müzakirə olunacağı bildirilir.

Səfər iki gün davam edəcək.