İranın səfirini Milli Məclisdə qəbul ediblər

Bu barədə İranın Azərbaycandakı səfirliyi "X" şəbəkəsində məlumat yayıb:

Səfir Müctəba Dəmirçilu Azərbaycan Milli Məclisinin sədr müavini və Azərbaycan-İran Parlamentlərarası Əlaqələr üzrə İşçi Qrupunun rəhbəri Ziyafət Əsgərovla görüşüb.

Tərəflər ikitərəfli münasibətlərin hazırkı vəziyyəti barədə fikir mübadiləsi aparıb və İrana qarşı hərbi təcavüzlə bağlı inkişafları müzakirə ediblər.

Müctəba Dəmirçilu Tehranın mövqeyini ətraflı şəkildə izah edərək, vəziyyətin müxtəlif aspektlərini qeyd edib və bu cür hərəkətlərin regional sabitlik və qlobal təhlükəsizlik üçün mənfi nəticələrini vurğulayıb. O, gələcəkdə oxşar təcavüz aktlarının və beynəlxalq hüququn pozulmasının qarşısını almaq üçün beynəlxalq ictimaiyyətin qətiyyətli addımlarının vacibliyini qeyd edib.

Səfir İran və Azərbaycan arasında dostluq əlaqələrinin möhkəmləndirilməsində parlamentlərin roluna xüsusi diqqət yetirib, parlamentlərarası əməkdaşlığın mövcud potensialından maksimum dərəcədə istifadə etməyin vacibliyini vurğulayıb.

Ziyafət Əsgərov öz növbəsində iki ölkə arasında münasibətlərin qarşılıqlı hörmət və mehriban qonşuluq prinsipləri üzərində qurulduğunu qeyd edib. O, xarici amillərdən və regional gərginliklərdən asılı olmayaraq, bu əlaqələrin ardıcıl olaraq inkişaf edib möhkəmlənəcəyini vurğulayıb.