İnam Kərimov Ali Məhkəmədə kollektivə təqdim edilib FOTO

Azərbaycan Respublikası Prezidentinin Administrasiyasının rəhbəri Samir Nuriyev Ali Məhkəmənin sədri İnam Kərimovu kollektivə təqdim edib. Bu barədə Ali Məhkəmə xəbər yayıb.

Samir Nuriyev təqdimat mərasimində çıxış edərək müstəqil Azərbaycanın müasir məhkəmə sisteminin inkişafının ilk növbədə xalqımızın Ümummilli Lideri Heydər Əliyevin adı ilə bağlı olduğunu bildirib. Diqqətə çatdırıb ki, Ulu Öndərin rəhbərliyi ilə hazırlanmış Azərbaycan Respublikasının Konstitusiyası məhkəmə hakimiyyətinin hakimiyyətlər bölgüsündə yerini, ədalət mühakiməsinin həyata keçirilməsinin əsas prinsip və şərtlərini müəyyən edib.

Prezident Administrasiyasının rəhbəri qeyd edib ki, Prezident İlham Əliyev hüquqi dövlət quruculuğu prosesini uğurla davam etdirərək məhkəmə-hüquq sistemində islahatları daha da dərinləşdirib. Qanunvericilik bazası təkmilləşdirilib, yeni regional məhkəmələr, o cümlədən kommersiya məhkəmələri və inzibati məhkəmələr təsis edilib, hakimlərin sayı artırılıb, onların sosial müdafiəsi gücləndirilib, məhkəmələrin maddi-texniki bazası müasirləşdirilib, bütün bu kompleks tədbirlər məhkəmələrin müstəqilliyini daha da möhkəmləndirib.

Samir Nuriyev Ali Məhkəmənin ədalət mühakiməsi institutlarının inkişaf etdirilməsi sahəsində fəaliyyətini bundan sonra daha da gücləndirəcəyinə, hüquq və azadlıqlarının etibarlı müdafiəsi üçün bütün zəruri tədbirləri həyata keçirəcəyinə və hüququn aliliyinin təmin edilməsi istiqamətində öz səylərini əsirgəməyəcəyinə inandığını bildirib, bu işdə yeni təyin olunmuş sədrə və kollektivə uğurlar arzulayıb.

Yeni təyin olunan Ali Məhkəmənin sədri İnam Kərimov dövlətimizin başçısının ona göstərdiyi yüksək etimada görə təşəkkürünü bildirib, məhkəmələrin müasir tələblərə uyğun qurulmasını, ədalət mühakiməsinin həyata keçirilməsində yüksək peşəkarlığın artırılmasını, idarəetmədə innovativ texnologiyaların tətbiqini qarşıda duran əsas hədəflər kimi səsləndirib.

Qeyd edək ki, bugün Azərbaycan Respublikası Ali Məhkəməsinin Plenumunun iclası keçirilib. İclasda Azərbaycan Respublikası Milli Məclisinin 2023-cü il 4 aprel tarixli qərarı ilə İnam İmdad oğlu Kərimovun Azərbaycan Respublikası Ali Məhkəməsinin hakimi vəzifəsinə təyinatı ilə əlaqədar andiçmə mərasimi keçirilib.

Plenum iclasında İnam Kərimov “Məhkəmələr və hakimlər” haqqında Azərbaycan Respublikasının Qanununun tələbinə əsasən ədalət mühakiməsini Azərbaycan Respublikasının Konstitusiyasına və qanunlarına tam uyğun olaraq, qərəzsiz, ədalətlə həyata keçirəcəyinə, hakimin müstəqilliyini və ləyaqətini qoruyub saxlayacağına, yüksək hakim adına hörmət ruhunda davranmağına and içib.