İran Pakistan, Misir və Türkiyənin zəmanətinə inanmır

İran Pakistan, Misir və Türkiyənin zəmanətlərini atəşkəs üçün kifayət hesab etmir.

Tehran BMT Təhlükəsizlik Şurası mexanizmləri vasitəsilə təhlükəsizliyin təmin edilməsi ehtimalına şübhə ilə yanaşır və Vaşinqtondan ultimatum qəbul etmək niyyətində deyil. İranın xarici işlər naziri Əraqçi bunu "Əl-Cəzirə"yə verdiyi müsahibədə bildirib.

Pakistan, Misir və Türkiyə kimi ölkələrin təhlükəsizlik zəmanətçisi kimi çıxış edib-etməməsi ilə bağlı şərhində nazir qeyd edib ki, beynəlxalq təcrübə bu cür alətlərin effektivliyinə şübhə yaradır.

"Təcrübə göstərir ki, hətta BMT Təhlükəsizlik Şurasının zəmanətləri də bizim üçün yetərli deyil. Tərəfdaşlarımız bu sahədə bir sıra ideyalar irəli sürüblər və biz hazırda münaqişəyə İranın şərtləri ilə son qoyularsa, hansı mexanizmlərin həqiqətən təsirli ola biləcəyini müəyyən etmək üçün onları öyrənirik", - Əraqçi vurğulayıb.

Nazir həmçinin ABŞ-ın təzyiq siyasətinin qəbuledilməzliyini vurğulayıb. "Biz ultimatumları qəbul etmirik. Süni məhdudiyyətlər yalnız vəziyyəti çətinləşdirir. ABŞ prezidenti yanaşmasını kökündən dəyişdirməlidir: İranın böyük və müstəqil xalqı ilə təhdid dilində danışmaq olmaz. Əks halda, cavab döyüş meydanında veriləcək", - diplomat bildirib.

Əraqçinin sözlərinə görə, milli maraqların qorunması və ölkə vətəndaşlarının təhlükəsizliyinin təmin edilməsi Tehranın əsas prioritetləri olaraq qalır.