İran Rəşt-Astara dəmir yolu xəttinin bir hissəsini tikib
İranda Rəşt-Xəzər dəmir yolu xətti istifadəyə verilib
![İran Rəşt-Astara dəmir yolu xəttinin bir hissəsini tikib](/uploads/images/2024/06/rs/image_750x_667567842f5f3-750-1080-resize.webp)
Şimal-Cənub dəhlizinin çatışmayan Rəşt-Astara dəmir yolunun 37 kilometrlik Rəşt-Xəzər xətti istifadəyə verilib.
Bu barədə İran KİV-ləri xəbər verir.
Məlumata görə, İran və Rusiya rəsmilərinin iştirakı ilə Rəşt-Xəzər dəmir yolu xətti işə salınıb.
Şimal-Cənub beynəlxalq nəqliyyat dəhlizinin bir hissəsi olan Rəşt-Xəzər dəmir yolu xətti bu gün prezident səlahiyyətlərini icra edən Məhəmməd Möxbər, yol və şəhərsalma naziri Mehrdad Bəzrpaş və digər rəsmilərin iştirakı ilə istifadəyə verilib.
Qeyd edək ki, 2023-cü il mayın 17-də Rusiya ilə İran arasında İranın şimalındakı Gilan vilayətində Rəşt-Astara dəmir yolunun tikintisinə dair saziş imzalanıb. 163 km uzunluğunda olan Rəşt-Astara dəmir yolu xəttində 9 stansiya tikiləcək. Bu dəmir yolunun tamamlanması ilə beynəlxalq Şimal-Cənub dəhlizi təkmilləşdiriləcək, İranın dəmir yolu şəbəkəsi Qafqaz ölkələri, Rusiya və Şimali Avropa ölkələri ilə birləşdiriləcək. Razılaşmaya görə, Rusiya tərəfi bu dəmir yolunun tikintisinə 1,6 milyard avro xərcləməlidir. Bu dəmir yolunun 48 ay ərzində tikilib başa çatdırılması planlaşdırılır.
Əlavə edək ki, 2000-ci il sentyabrın 12-də Rusiya, İran və Hindistan arasında imzalanmış hökumətlərarası saziş əsasında Şimal-Cənub Nəqliyyat Dəhlizinin təməli qoyulub. Azərbaycan bu sazişə 2005-ci ildə qoşulub. Ümumilikdə 13 ölkə tərəfindən sözügedən sənəd ratifikasiya edilib (Azərbaycan, Belarus, Bolqarıstan, Ermənistan, Hindistan, İran İslam Respublikası, Qazaxıstan, Qırğızıstan, Oman Sultanlığı, Rusiya Federasiyası, Tacikistan, Türkiyə, Ukrayna). Dəhlizin yaradılmasında məqsəd Hindistandan Rusiyaya, eləcə də Şimali və Qərbi Avropaya daşınan malların çatdırılma müddətlərini azaltmaqdır (cari marşrutla çatdırılma müddəti 6 həftədən çoxdur, Şimal Cənub vasitəsilə 3 həftə olacağı gözlənilir).