İran və Ermənistan XİN başçıları görüşüb YENİLƏNİB

16:43

İran hələ ABŞ Prezidenti Donald Trampın göndərdiyi İranın nüvə proqramı ilə bağlı məktuba cavab verməyib.

Ermənistan KİV-i xəbər verir ki, bu barədə İranın xarici işlər naziri Abbas Araqçi İrəvanda erməni həmkarı Ararat Mirzoyanla birgə brifinqdə bildirib.

"Biz hələ ABŞ Prezidentinin məktubuna cavab verməmişik. Cavab hazırlanma prosesindədir", - o qeyd edib.

Bununla yanaşı, A.Araqçi vurğulayıb ki, İran təzyiq, hərbi təhdid və iqtisadi sanksiyaların artırılması fonunda ABŞ ilə birbaşa danışıqlar aparmayacaq: "Lakin biz nüvə proqramımız ətrafında şəffaflığın formalaşmasının tərəfdarıyıq və bu istiqamətdə danışıqlar aparmağa hazırıq. Biz heç vaxt danışıqlar masasını tərk etməmişik və tərk etməyəcəyik".

Ötən həftə “Axios” portalı mənbələrə istinadən bildirib ki, ABŞ Prezidenti Donald Tramp İranın Ali rəhbəri Ayətullah Əli Xameneiyə məktubunda iki ay ərzində İranın nüvə proqramı üzrə yeni razılaşmaya nail olmağı tələb edib.

***

15:43

Ermənistanın xarici işlər naziri Ararat Mirzoyan İrəvanın sülh sazişinin imzalanması üçün Azərbaycanla dialoqu davam etdirməyə hazır olduğunu bildirib.

Ermənistan KİV-i xəbər verir ki, bu barədə A.Mirzoyan iranlı həmkarı Abbas Araqçi ilə keçirdiyi brifinqdə bildirib.

A.Mirzoyan vurğulayıb ki, uzunmüddətli sülhün təmin edilməsi üçün qarşılıqlı məqbul həllərin tapılması ilə bağlı işi davam etdirmək, danışıqlar aparmaq lazımdır.

"Bunun alternativi sadəcə yoxdur", - XİN başçısı bildirib.

O əlavə edib ki, İrəvan Bakı ilə sülh sazişini mümkün qədər tez imzalamağa hazırdır.

Xatırladaq ki, Azərbaycan Xarici İşlər Nazirliyi martın 13-də Ermənistanla sülh sazişi üzrə danışıqların bitməsi ilə bağlı bəyanat yayıb. Bəyanatda Azərbaycan və Ermənistan arasında sülh və dövlətlərarası münasibətlərin qurulması haqqında Saziş layihəsinin mətni üzrə danışıqların yekunlaşdığı qeyd olunub.

Eyni zamanda, Azərbaycan dəfələrlə bəyan edib ki, sülh sazişinin imzalanması üçün Ermənistan iki şərti yerinə yetirməlidir: Ermənistan Konstitusiyasındakı Azərbaycanın suverenliyi və ərazi bütövlüyünə qarşı iddiaları aradan qaldırmalı, eləcə də ATƏT-in Minsk qrupunun və aidiyyəti strukturlarının buraxılmasını dəstəkləməlidir.

***
15:20

İrəvan və Tehran yaxın zamanlarda İranda Ermənistan yük maşınlarına satılan dizel yanacağının qiymətinin artması ilə bağlı problemi həll edəcək.

Bunu Ermənistanın xarici işlər naziri Ararat Mirzoyan martın 25-də iranlı həmkarı Abbas Araqçi ilə birgə keçirdiyi brifinqdə bildirib.

“Bu istiqamətdə iş aparılıb, hər iki ölkənin sürücüləri üçün müəyyən sadələşdirmələr təklif edən təxmini formula var. İşlər yaxın vaxtlarda yekunlaşacaq və bundan sonra qərarı dərc edəcəyik”, - o, brifinqdə qeyd edib.

Erməni həmkarının açıqlamasını iranlı nazir də təsdiqləyib. A.Araqçi vurğulayıb ki, ağır yük maşınları üçün rüsumlar da müzakirə olunub.

Onun sözlərinə görə, tərəflər xərclərin azaldılması və bununla da yük daşımalarının artmasına şərait yaradılması barədə razılığa gəliblər.

***

12:36

İran xarici işlər naziri Abbas Araqçi İrəvanda Ermənistan xarici işlər naziri Ararat Mirzoyan ilə görüşüb.

Bu barədə İran Xarici İşlər Nazirliyinin mətbuat xidməti məlumat yayıb.

Tərəflər ikitərəfli münasibətləri və Cənubi Qafqazdakı regional məsələləri müzakirə ediblər.