BLOQ

İrəvandakı xal. Amma o xal nə xaldır, heç kim bilmir...

Azərbaycan həbsxanalarında cəza çəkən "Qarabağ xuntası"nın liderləri qanuna görə Ermənistan vətəndaşı sayıla bilməz

İrəvandakı xal. Amma o xal nə xaldır, heç kim bilmir...
  • Oxuma müddəti:

    2 dəqiqə

  • Bakıda məhkum edilmiş "Qarabağ xuntası" liderləri ilə bağlı Ermənistanda növbəti həngamə qoparıblar. Müxalifət Ermənistan hakimiyyətini və ombudsmanını vətəndaşları qorumaq üçün konstitusiya öhdəliklərini yerinə yetirməməkdə, onların vətənlərinə qayıtmasını tələb etməməkdə, saxlanma şəraitləri ilə bağlı sorğu-sual etməməkdə və s. ittiham edir. Ermənistan hakimiyyəti və ombudsman özlərini birtəhər müdafiə edərək, məsələni qaldırdıqlarını, əllərindən gələni etdiklərini və s. deyirlər.

    Amma nədənsə heç kim bir vacib detala diqqət yetirmir. Qarabağ ermənilərinin könüllü şəkildə Ermənistana köçməsindən sonra həmin ölkənin hökuməti rəsmi olaraq əvvəllər onlara verilmiş Ermənistan pasportlarının onların vətəndaşlığını sübut etmədiyini və onların "səyahət sənədlərindən" - beynəlxalq səyahət üçün sertifikatlardan başqa bir şey olmadığını elan etdi.

    Ermənistan vətəndaşlığını almaq və konstitusiya hüquqlarından istifadə etmək üçün Qarabağ erməniləri xüsusi müraciət ərizəsi təqdim etməli və sıfırdan qanuni vətəndaşlıq prosesindən keçərək "əsl pasportlar" əldə etməlidirlər. Qarabağ ermənilərinin əhəmiyyətli bir hissəsi hələ bu proseduru tamamlamayıb və Ermənistan vətəndaşı hesab edilmir.

    Təbii ki, Azərbaycan həbsxanalarında cəza çəkən "Qarabağ xuntası"nın liderləri də bu proseduru tamamlamayıblar. Buna görə də Ermənistan Konstitusiyasında təsbit olunmuş hüquqlar onlara şamil edilə bilməz. Müvafiq olaraq, Ermənistan dövlət orqanları üçün bir erməninin Los-Ancelesdə fırıldaqçılığa, Soçidə soyğunçuluğa və ya Azərbaycanda digər cinayətlərə görə həbs olunmasının heç bir fərqi yoxdur - onlar Ermənistan vətəndaşlığına malik deyillər və Ermənistan hakimiyyəti bunlara görə məsuliyyət daşıya bilməz.

    Məntiqi olaraq, Azərbaycanda cəzalarını başa vurduqdan sonra vətəndaşlığı olmayan şəxslər olaraq, ən azı formal olaraq, onlara alternativ təklif etməyə borcluyuq: istər Azərbaycan vətəndaşlığını qəbul edib cəmiyyətimizə inteqrasiya etmək, istərsə də başqa bir ölkəyə deportasiya olunmaq istəyii. Əgər onlar Ermənistanı seçsələr, orada vətəndaşlıq almaq üçün hüquqi prosesdən keçməli olacaqlar.

    Ona görə də, Ermənistandakı bütün bu hay-küyün nəyə lazım olduğunu başa düşə bilmirəm...