Moskva Azərbaycan vətəndaşı Əsgərovu yenə cərimə edib

Moskvada məhkəmə icraçıları məşhur televiziya oyun şousu "Nə? Harada? Nə vaxt?"ın keçmiş iştirakçısı Rövşən Əsgərovu "xarici agent"in fəaliyyətini tənzimləyən qaydaları pozduğuna görə cərimələyiblər. Bu barədə RİA Novosti məhkəmə sənədlərinə istinadən məlumat verib.

Cərimə 40.000 rubl (850 manat) təşkil edib. Məhkəmə icraçılarının sözlərinə görə, Əsgərovun hələ də ümumi məbləği 90.000 rubl (1912 manat) olan iki ödənilməmiş cəriməsi var. 

Məhkəmə keçmiş bilicini "xarici agent" kimi hesabat vermədiyinə və bu barədə müvafiq elana malik olmadığına görə cərimələyib.

Uzun müddət Rusiyada yaşayan Rövşən Əsgərov hazırda vətəni Azərbaycanda yaşayır. Rusiya Ədliyyə Nazirliyi onu 2022-ci ilin dekabrında "xarici agent" elan edib. Həmin ilin may ayının sonlarında Əsgərov marşal Georgi Jukov haqqında Facebook paylaşımına görə nasizmi reabilitasiya etmək ittihamı ilə qiyabi həbs edilib.

2025-ci ilin yanvar ayında Rosfinmonitoring Rövşən Əsgərovu "ekstremistlər və terrorçular" siyahısına əlavə etdi. Fevral ayında məhkəmə ona qarşı ümumi məbləği 130.000 rubl olan ödənilməmiş cərimələrə görə üç icra icraatı başlatdı. Üç icraatın sonuncusu 2025-ci ilin fevral ayında başladı.

Məhkəmə bundan əvvəl Əsgərovu üç dəfə cərimələmişdi. 2023-cü ilin sentyabr və avqust aylarında məhkəmə icraçıları ona əvvəlcə "xarici agent" nişanını göstərmədiyinə görə, daha sonra isə səlahiyyətli orqana "xarici agent" kimi hesabat təqdim etmədiyinə görə hər birinə 40.000 rubl ödəməyi əmr etdilər. Borcların ödənilməməsi səbəbindən Rövşən Əsgərovun Rusiyadakı hesabları dondurulub.